04 avqust 1960-cı ildə Laçın rayonunun Minkənd kəndində anadan olub. 1967-1977-ci illərdə Minkənd kənd orta məktəbində, 1977-1982-ci illərdə isə Bakı Dövlət Universitetinin Fizika fakültəsində təhsil alıb. 1982-ci ildə keçmiş SSRİ Müdafiə Sənayesi Nazirliyinin Tətbiqi Fizika İnstitutunun Bakı filialında təyinatla mühəndis vəzifəsində əmək fəaliyyətinə başlayıb. 1989-cu ildə namizədlik, 2007-ci ildə doktorluq dissertasiyası müdafiə edib, 2010-cu ildə professor elmi adı allb.
1993-cü ilədək Fotoelektronika Elmi Tədqiqat İnstitutunda böyük elmi işçi vəzifəsində çalışıb. 1994-cü ildə Bakı Dövlət Universitetinin Fizika fakültəsinin nəzdində Bərk cisimlər Elektronikası Elmi-Tədqiqat laboratoriyasına aparıcı elmi işçi, 1994-cü ilin dekabr ayından isə həmin laboratoriyanın müdiri vəzifəsinə təyin olunub. 2010-2023-cü illərdə Yarımkeçiricilər fizikası kafedrasında professor vəzifəsində çalışıb. 2023-cü ildən Nanomaterialların kimyəvi fizikası kafedrasının müdiridir.
Tədqiqat sahəsi Bərk cisim elektronikası və mikroelektronika, nanotexnologiya, neqatronika, elektrokimyəvi çökdürmə. A2B6 tipli birləşmələrinin bərk məhlullarının nanozərrəcikli nazik təbəqələrinin alınması və tədqiqi ilə əlaqədardır. 200-dən çox elmi məqalənin, 4 müəlliflik şəhadətnaməsinin, 2 patentin, 1 monoqrafiyanın, Xarici və Respublika nüfuzlu jurnallarında nəşr olunan 70-ə qədər Beynəlxalq konfrans materialı və 80 tezisin müəllifidir. 1 beynəlxalq qrant layihəsiin rəhbəri, 3 namizədlik dissertasiyasının elmi rəhbəri olub. Azərbaycan Respublikası Prezidenti Yanında Ali Attestasiya Komissiyasında Fizika bölməsi üzrə Ekspert Şurasının üzvüdür. "BDU-nun 100 illiyi (1919-2019)" Azərbaycan Respublikasının yubiley medalı ilə təltif olunub.