23 oktyabr 1959-cu ildə anadan olmuşdur. 1976-cı ildə BDU-nun Fizika fakültəsinə daxil olmuş və 1981-ci ildə həmin fakültəni fərqlənmə diplomu ilə bitirmişdir. 1983-cü ildə aspiranturaya daxil olmuşdur. 1986-cı ildə həmin ixtisas üzrə fizika-riyaziyyat elmləri namizədi, 2000-ci ildə “Biofizika” ixtisası üzrə biologiya elmləri doktoru alimlik dərəcələrini almaq üçün dissertasiya müdafiə etmişdir. 2007-ci ildə “Biofizika” ixtisası üzrə professor elmi adı almışdır. 1986-2011-ci illər ərzində BDU-da “Molekulyar biofizika” Elmi-tədqiqat laboratoriyasında kiçik elmi işçi, elmi işçi, böyük elmi işçi, aparıcı elmi işçi, “Fizika problemləri” Elmi-tədqiqat İnstitutunda baş elmi işçi və Elmi-tədqiqat hissəsinin müdiri vəzifələrində çalışmışdır. 2011-ci ilin may ayından BDU-nun Tədrisin təşkili və təlim texnologiyaları üzrə prorektorudur. Elmi fəaliyyəti əsasən bioloji aktiv molekulların – zülal, peptid və hormonların fəza quruluşunun və quruluş-funksiya əlaqələrinin tədqiqi ilə bağlıdır. Yerli və xarici nəşrlərdə dərc edilmiş 300 elmi əsərin, bir monoqrafiyanın, dərslik və dərs vəsaitinin, bir ixtiranın müəllifidir. Onun rəhbərliyi ilə 5 elmlər namizədi hazırlanmışdır. “Tərəqqi” medalı ilə təltif olunmuşdur. BDU-nun Elmi Şurasının, “Bakı Universitetinin Xəbərləri” jurnalının Redaksiya Heyətinin üzvü və BDU-nun nəzdində fəaliyyət göstərən D.02.012 Dissertasiya Şurasının üzvüdür.
ƏLİYEVA İRADƏ NURƏDDİN QIZI
