1922-ci ildə anadan olmuşdur. 1944-cü ildə Bakı Dövlət Universitetinin fizika-riyaziyyat fakültəsini fizika ixtisası üzrə bitirmiş, AMEA-nın Fizika İnstitutuna kiçik elmi işçi vəzifəsinə dəvət olunmuşdur. 1945-ci ildə aspiranturaya qəbul olmuş və dissertasiya mövzusu üzrə elmi tədqiqat işini Moskva Dövlət Universitetinin Rəqslər kafedrasının müdiri professor V.V.Miqulinin rəhbərliyi altında yerinə yetirmişdir. 1950-ci ildə Moskvada namizədlik dissertasiyasını müdafiə edib Bakıya qayıtmış və AMEA-nın Fizika-Riyaziyyat İnstitutunda Radiofizika laboratoriyasında baş elmi işçi vəzifəsində işə başlamışdır. 1951-ci ildən həmin laboratoriyaya rəhbərlik L.M.İmanova tapşırılmışdır. 1952-ci ildən maye və bərk cisimlərin dielektrik relaksasiyasının radiospektroskopik üsulla tədqiqi ilə məşğul olmağa başlamışdır. 1976-cı ildə AMEA-nın həqiqi üzvü seçilmiş, 1979-cu ildə “Əməkdar elm xadimi” adına layiq görülmüşdür. Elmi tədqiqat işi ilə paralel olaraq pedaqoji fəaliyyətlə də məşğul olmuş, keçən əsrin 50-ci illərində BDU-nun fizika fakültəsinin tələbələrinə radiofizikadan və fiziki elektronikadan mühazirələr oxumuşdur.
Uzun müddət spirtlərin, halogenli benzolun, onların müxtəlif qeyri-polyar mayelərdə məhlullarının radiospektroskopik üsulla dielektrik relaksasiyasını müxtəlif tezlik və temperatur aralıqlarında tədqiq etmişdir. Tədqiqatların nəticələri əsasında elektromaqnit dalğalarının udulmasını ifadə edən asılılıqlar qurulmuş, onların əsasında dielektrik əmsalı, kritik dalğa uzunluğu, molekulun fırlanma hərəkətinə mane olan potensial enerji çəpərinin hündürlüyü, aktivləşmə enerjisi və bir çox başqa mühüm parametrlər təyin edilmişdir. 15-ə qədər molekulun mikrodalğa spektrini tədqiq etmişdir. Tallium aşqarlı selenin dielektrik relaksasiyasını radiospektroskopiya üsulu ilə tədqiq etmiş və maraqlı nəticələr almışdır. Yalnız selen yarımkeçiricinin radiospektropik üsulla tədqiqi ilə kifayətlənməyən akad. İmanov keçən əsrin 70-ci illərində vanadium, tellur və qələvi metal oksidləri əsaslı iki və üç komponentli yarımkeçirici şüşələrin quruluş xüsusiyyətlərinin, elektrik və optik xassələrinin tədqiqinə başlamışdır.