27 avqust 1936-cı ildə anadan olmuşdur. 1961-ci ildə Leninqrad (indiki Sankt-Peterburq) Universitetini bitirib Astrofizika kafedrasında aspiranturaya daxil olmuşdur. 1966-cı ildə namizədlik, 2003-cü ildə doktorluq dissertasiyalarını müdafiə etmiş, 1991-ci ildə professor elmi adı almışdır. 1966-1969-cu illərdə AMEA-nın Şamaxı Astrofizika Rəsədxanasında çalışmışdır. 1969-cu ildən BDU-nun Molekulyar fizika və optika kafedrasında elmi və pedaqoji fəaliyyətə başlamışdır. 1975-ci ildən Astrofizika kafedrasında dosent, 1991-ci ildən professor vəzifəsində, 1997-ci ildən BDU-nun Astrofizika kafedrasının müdiri vəzifəsində çalışır.
Elmi fəaliyyəti, əsasən, Günəş fizikası ilə əlaqədardır. Yerli və xarici elmi nəşrlərdə 200-dən çox elmi məqalənin müəllifidir. Rəhbərliyi ilə 25-dən çox magistr dissertasiyası yerinə yetirilmiş, 1 elmlər doktoru, 3 elmlər namizədi hazırlanmışdır, 7 dərslik və dərs vəsaitinin, 1 monoqrafiyanın müəllifidir.
1991-ci ildən kosmosun öyrənilməsində və gənc kadrların hazırlanmasında xidmətlərinə görə SSRİ Kosmonavtika Federasiyasının diplomuna layiq görülmüşdür. 2001-ci ildən Avropa Astronomiya Cəmiyyətinin üzvüdür. “Əməkdar müəllim” fəxri adına layiq görülmüşdür.
Fizika fakültəsinin Elmi Şurasının, “Bakı Universitetinin Xəbərləri” və “Azərbaycan Astronomiya jurnalının” Redaksiya Heyətinin üzvü, Şamaxı Astrofizika Rəsədxanasının nəzdində fəaliyyət göstərən 21.08.01 – “Astronomiya və Ulduz astronomiyası” Dissertasiya Şurasının sədr müavinidir.