23 may 1935-ci ildə Ağdaş şəhərində anadan olub. 1942-1952-ci illərdə orta məktəbdə oxuyub. 1952-1957-ci illərdə BDU-nun Fizika fakültəsində təhsil alıb və Fizika fakültəsini fərqlənmə diplomu ilə bitirib. 1958-ci ildə Moskva Dövlət Universitetinin aspiranturasına daxil olub və 1963-cü ildə dissertasiya işini müdafiə edərək "Nəzəri fizika" ixtisası üzrə fizika-riyaziyyat elmləri namizədl elmi dərəcəsini alıb. 1973-cü ildə dissertasiya işini müdafiə edərək "Nəzəri fizika" ixtisası üzrə fizika-riyaziyyat elmləri doktoru elmi dərəcəsini alıb. 1974-cü ildə professor elmi adını almışdır.
1968-ci ildə AMEA-nın Fizika İnstitutunda baş elmi işçi vəzifəsində fəaliyyətə başlayıb. Bu illər uzun müddətli Dubna şəhəri (Moskva vilayəti) Birləşmiş Nüvə Araşdırmaları İnstitutunda elmi ezamiyyətdə olub. 1968-ci ildən BDU-nun Nəzəri fizika kafedrasında elmi və pedaqoji fəaliyyətə başlayıb. 1973-1979-cu illərdə Fizika fakültəsinin dekanı vəzifəsində çalışıb. 1972-1973 illərdə Roma Universitetində elmi-tədqiqat işləri aparıb. 1973-cü ildən 1980-ci ilə qədər BDU-da Fizika üzrə Dissertasiya Şurasının sədri olub.
Elmi fəaliyyəti zəif, elektromaqnit və güclü qarşılıqlı təsirdə iştirak edən leptonlar və hadronların spin hallarının nəzəri tədqiqinə həsr olunub. 140-dan çox elmi məqalənin müəllifidir. Onun rəhbərliyi ilə 6 nəfər dissertasiya müdafiə edərək fizika-riyaziyyat elmlər namizədi elmi dərəcəsi alıb. 1989-cu ildə BDU-da Yüksək Enerjilər Fizikası Elmi Tədqiqat Laboratoriyasını yaradıb və ömrünün sonuna qədər ona rəhbərlik edib. 4 dərsliyin müəllifidir. 1992-1998-ci illərdə Türkiyənin Ankara, Trabzon, Kayseri universitetlərində yüksək enerjilər fizikasından dərs deyib və elmi-tədqiqat işlərinə rəhbərlik edib. Faiq Sadıxov 2009-cu il aprelin 9-da vəfat edib.