"Maddə quruluşu" kafedrasının professorunun yubileyidir
Bu gün Bakı Dövlət Universitetinin Fizika fakültəsinin "Maddə quruluşu" kafedrasının professoru Sacidə Əbdülvahabovanın yubileyidir.
Əbdülvahabova Sacidə Qafar qızı 02 iyun 1947-cı ildə Bakı şəhərində anadan olub. 1964-cü ildə Bakı şəhəri Suraxanı rayonu 172 saylı orta məktəbdə təhsil alıb və orta məktəbi “əla” qiymətlərlə bitirib. 1964-1969-cu illərdə BDU-nun Fizika fakültəsində təhsil alıb və Universiteti fərqlənmə diplomu ilə bitirib. 1970-1974-cü illərdə Dubna şəhərində yerləşən Birləşmiş Nüvə Tədqiqatları İnstitunda (BNTİ) aspirant olub. 1974-cü ildə BNTİ-də dissertasiya müdafiə edərək fizika-riyaziyyat elmləri namizədi elmi dərəcəsini alıb. 1975-ci ildən BDU-nun “Maddə quruluşu” kafedrasında müəllim kimi fəaliyyətə başlayıb. 1995-ci ildə dissertasiya müdafiə edərək fizika-riyaziyyat elmləri doktoru elmi dərəcəsini alıb. 1996-cı ildən “Maddə quruluşu” kafedrasının professorudur. Elmi fəaliyyəti adronların adron və nüvələrlə qarşılıqlı təsirinin nəzəri tədqiqinə həsr olunub. 200-dən çox elmi məqalənin və 2 kitabın müəllifidir. Onun rəhbərliyi ilə dissertasiya müdafiə edərək 2 nəfər fizika-riyaziyyat elmləri namizədi elmi dərəcəsi alıb.
BDU-nun Elmi Şurasının, Fizika fakültəsinin Elmi Şurasının və Azərbaycan Respublikasının Prezidenti yanında Ali Attestasiya Komissiyasının Fizika üzrə ekspert şurasının üzvüdir. 1997-cı ildən hal-hazıradək qeyri-hökumət təşkilatı olan “Qadın Problemlərinin Tədqiqat Birliyinin-Qadın İnstitutunun” direktorudur. 2006-ci ildə Birləşmiş Millətlər Təşkilatının Qadınların İnkişaf Fondunun Gender bərabərliyi uğrundakı fəaliyyətinə görə xüsusı Sertıfıkat ilə təltif edilib. 1999-cu ildə BDU-nun 80 illiyi münasibətilə "Fəxri Fərman"la, 2009-cu ildə Azərbaycan Respublikasının Prezidenti tərəfindən "Tərəqqi" medalı, 2019-cu ildə isə "BDU-nun 100 illiyi (1919-2019)" yubiley medalı ilə təltif olunub.
Sacidə xanım zəhmətkeş alim, mahir pedaqoq olmaqla yanaşı, həm də incə qəlbli insandır. Onun 1 oğlu və 2 nəvəsi var. Fizika fakültəsi ailəsi olaraq Sacidə xanımı 75 illik yubileyi münasibətilə səmimi qəlbdən təbrik edirik, ona möhkəm can sağlığı və elmi-pedaqoji fəaliyyətində uğurlar arzulayırıq.