Optika və molekulyar fizika kafedrasının müəlliminin yubileyi
Bu gün Bakı Dövlət Universitetinin Fizika fakültəsinin Optika və molekulyar fizika kafedrasının müəllimi Lətif Əliyevin yubileyidir.
Əliyev Lətif Paşa oğlu 14 iyun 1962-ci ildə Tovuz rayonunun Qədirli kəndində anadan olub. 19701-1980-ci illərdə Qədirli kənd orta məktəbində təhsil alıb. 1980-ci ildə BDU-nun Fizika fakültəsinə daxil olub, 1985-ci BDU-nu fizik, fizika müəllimi ixtisasları üzrə ilə bitirib. 1990-1993-cü illərdə BDU-nun Fizika fakültəsinin disertantı olub. 1994-cü ildə dissertasiya müdafiə edərək "Nəzəri fizika" ixtisası üzrə fizika-riyaziyyat elmləri namizədi elmi dərəcəsini alıb.
1986-1991-ci illərdə “Xəzri” Zaqafqaziya Texnoloji Quraşdırma idarəsində EHM üzrə mühəndis, 1991-2007-ci illərdə BDU-nun Fizika fakultəsinin Optika və molekulyar fizika kafedrasında baş laborant, 2007-2022-ci illərdə 0,5 şt müəllim vəzifələrində çalışıb, 2022-ci ildən halhazıra qədər isə Optika və molekulyar fizika kafedrasında 0,5 şt baş müəllim vəzifəsində işləyir. Eyni zamanda Azərbaycan Respublikası Ədliyyə Nazirliyinin Məhkəmə Ekspertizası Mərkəzində 2000-2002-ci illərdə böyük elmi işçi, 2002-2007-ci illərdə aparıcı elmi işçi, 2007-2019-cu illərdə baş ekspert vəzifələrində çalışıb, 2019-cu ildən halhazıra qədər Əlyazmalar və səslərin ekspertizaları şöbəsinin rəis müavini vəzivəsində işləyir.
Audio və videoyazıların kriminalistik tədqiqi sahəsində elmi tədqiqatlar aparır. Respublika və xarici ölkələrin elmi mətbuatında dərc olunmuş 50-dən çox elmi işin və 6 kitabın müəllifidir. 2019-cu ildə "BDU-nun 100 illiyi (1919-2019)" Azərbaycan Respublikasının yubiley medalı ilə, 2022-ci ildə isə "Tərəqqi" medalı ilə təltif olunub.
Lətif Əliyev mahir ekspert, ustad pedaqoq olmaqla yanaşı, həm də incə qəlbli insan və gözəl ailə başçısıdır. Onun 2 oğlu və 1 qızı. Həyat yoldaşı Səkinə xanım müəllimədir. Oğlu Babək iqtisadçı, Tuncay isə hüquqşunasdır, qızı Tansu 11-ci sinif şagirdidir.
Fizika fakültəsi ailəsi olaraq Lətif müəllimi 60 illik yubileyi münasibətilə səmimi qəlbdən təbrik edirik, ona möhkəm can sağlığı və elmi-pedaqoji fəaliyyətində uğurlar arzulayırıq.