Astrofizika kafedrasının dosentinin yubileyi
Bu gün Bakı Dövlət Universitetinin Astrofizika kafedrasının dosenti, fizika-riyaziyyat elmləri namizədi Bayram Rüstəmovun yubileyidir.
Bayram Nizam oğlu Rüstəmovun 29 aprel 1954-cü ildə Bakı şəhərində anadan olub. 1961-1971-ci illərdə Qobustan rayonu Nərimankənd kənd orta məktəbdə təhsil alıb və orta məktəbi “əla” qiymətlərlə bitirib. 1971-ci ildə Bakı Dövlət Universitetinin Fizika fakültəsinə daxil olub və 1976-cı ildə həmin fakültəni fizik, fizika müəllimi ixtisası üzrə bitirib. 2003-cü ildə “T Tauri tipli ulduzlar və FUOR lar” mövzusunda namizədlik dissertasiyası müdafiə edərək “astrofizika, radioastronomiya” ixtisası üzrə fizika-riyaziyyat elmləri namizədi elmi dərəcəsini alıb. 2014-cü ildə “astrofizika və ulduz astronomiyası” ixtisası üzrə dosent elmi adını alıb.
Bayram Rüstəmov 1976-cı ildə təyinatla AMEA N.Tusi adına Şamaxı Astrofizika Rəsədxanasında elmi fəaliyyətə başlayıb və həmin vaxtdan hal-hazıra kimi Şamaxı Astrofizika Rəsədxanasında müxtəlif vəzifələrdə (kiçik elmi işçi, elmi işçi, böyük elmi işçi, aparıcı elmi işçi, şöbə müdiri) çalışaraq elmi tədqiqatla məşğul olub. 1977-ci ildə SSRİ EA Krım astrofizika rəsədxanasında praktik astrofizika ixtisası üzrə ixtisaslaşma kursu keçib. 2017-ci ildə Şamaxı Astrofizika Rəsədxanasında Bakı Dövlət Universitetinin Astrofizika kafedrasının filialının rəhbəri təyin olunub. 2004-2021-ci illərdə Şamaxı Astrofizika Rəsədxanasında şöbə müdiri vəzifəsində işləyib. 2021-ci ildən hal-hazıradək Bakı Dövlət Universitetinin Fizika fakültəsinin Astrofizika kafedrasında dosent vəzifəsində çalışır.
Bayram Rüstəmov 2004-cü ildən hal-hazıradək AMEA Şamaxı Astrofizika Rəsədxanasının Elmi Şurasının üzvüdür. 2013-2018-ci illərdə Şamaxı Astrofizika Rəsədxanasının nəzdində FD 01.241 Fəlsəfə Doktoru Dissertasiya Şurasının üzvü olub. Cavan ulduzların və qoşa ulduz sistemlərinin spektral və fotometrik tədqiqi sahəsində elmi tədqiqatlar aparır. Elmi mətbuatında dərc olunmuş 50-dən çox elmi işin müəllifidir. Onun rəhbərliyi ilə dissertasiya müdafiə edərək 2 nəfər fizika-riyaziyyat elmləri namizədi elmi dərəcəsi alıb.
Bayram Rüstəmov zəhmətkeş alim, ustad pedaqoq olmaqla yanaşı, həm də gözəl insandır. Fizika fakültəsi ailəsi olaraq Bayram müəllimi 70 illik yubileyi münasibətilə səmimi qəlbdən təbrik edirik, ona möhkəm can sağlığı və elmi-pedaqoji fəaliyyətində uğurlar arzulayırıq.