ASTROFİZİKA KAFEDRASININ ƏMƏKDAŞININ YUBİLEYİ
Bu gün Bakı Dövlət Universitetinin Astrofizika fizikası kafedrasının dosenti, astronomiya elmləri doktoru Zahir Səmədovun yubileyidir.
Zahir Ağamurad oğlu Səmədov 21 yanvar 1960-cı ildə Şamaxı şəhərində anadan olub. 1967-1977-cı illərdə Şamaxı şəhərində 1 saylı orta məktəbdə təhsil alıb və orta məktəbi “əla” qiymətlərlə bitirib. 1977-ci ildə BDU-nun Fizika fakültəsinə daxil olub və 1982-ci ildə həmin fakültəni fizik, fizika müəllimi ixtisası üzrə bitirib. 1985-1988-ci illərdə Azərbaycan Respublikası Kosmik Tədqiqatlar Institutunun aspirantı olub. 1993-cü ildə “A və F spektral sinifli ifratnəhəng ulduzların atmosferlərinin tədqiqi” mövzusunda dissertasiya müdafiə edərək Astrofizika və ulduz astronomiyası ixtisası üzrə fizika-riyaziyyat elmləri namizədi elmi dərəcəsini alıb. 2008-ci ildə dosent elmi adını alıb. 2022-ci ildə “A-G spektral sinifli ulduzların fundamental parametrləri və kimyəvi tərkibi” mövzusunda dissertasiya müdafiə edərək Astronomiya elm sahəsi üzrə Elmləri doktoru elmi dərəcəsi alıb.
Zahir Səmədov ARETN Şamaxı Astrofizika Rəsədxanasında 1982-1985-ci illərdə kiçik elmi işçi, 1988-1997-ci illərdə elmi işçi, BDU-nun Fizika fakültəsinin Astrofizika kafedrasında 1997-2000-ci illərdə assistent, 2000-2006-cı illərdə baş müəllim vəzifələrində çalışıb. O, 2006-cı ildən hal-hazıradək BDU-nun Fizika fakültəsinin Astrofizika kafedrasında dosent vəzifəsində çalışır.
Zahir Səmədov Ulduz atmosferlərinin kimyəvi tərkibi və təkamül xüsusiyyətləri istiqamətində elmi tədqiqatlar aparır. Ayrıd olunmayan qoşa ulduzların ümumi spektrlərinin tədqiqi üsulunu hazırlayıb. Respublika və xarici ölkələrin elmi mətbuatında dərc olunmuş 100-dən çox elmi işin və “Astrofizikadan mühazirələr” adlı dərs vəsaitinin müəllifidir. "BDU-nun 100 illiyi (1919-2019)" Azərbaycan Respublikasının yubiley medalı ilə təltif olunub.
Fizika fakültəsi ailəsi olaraq Zahir müəllimi 65 illik yubileyi münasibətilə səmimi qəlbdən təbrik edirik, ona möhkəm can sağlığı və elmi-pedaqoji fəaliyyətində uğurlar arzulayırıq.