Azərbaycan və Türkiyə astrofiziklərinin İkili İşbirliyi görüşü keçirilib
03 aprel 2023-cü il tarixində Bakı Dövlət Universitetinin Fizika fakültəsinin Astrofizika kafedrası ilə Türkiyənin Ege Universiteti Fən fakültəsinin Astronomi və Uzay Bilimləri kafedrası arasında İkili İşbirliyi görüşü keçirilib. Görüş online şəkildə Zoom platforması üzərində baş tutub.
Görüşdə BDU tərəfindən Fizika fakültəsi Astrofizika kafedrasının müdiri dosent Kəmalə Alışeva, kafedranın dosentləri Xidir Mikayılov, Zahir Səmədov və Bayram Rüstəmov, Ege Universiteti tərəfindən isə Fən fakültəsinin dekan müavini professor Esin Sipahi, Astronomi və Uzay Bilimləri kafedrasının müdiri, professor Ömər Lütfi Dəyirmançı, professor Mutlu Yıldız, Ege Universiteti Rəsədxanasının müdiri dosent Hasan Ali Dal iştirak ediblər.
Kəmalə Alışeva BDU ilə Türkiyənin ali məktəbləri arasında əlaqələrin genişləndiyini, son günlər qardaş ölkənin bir neçə universiteti ilə əməkdaşlıq müqavilələrinin imzalandığını və müxtəlif istiqamətlərdə ortaq layihələrin planlaşdırıldığını, tezliklə Ege Universiteti ilə də belə əməkdaşlığın qurulacağına ümid etdiyini vurğuladı. Daha sonra o, BDU-nun Astrofizika kafedrası haqqında qısa məlumat verdi və kafedra əməkdaşlarını toplantı iştirakçılarına təqdim etdi. Ege Universiteti tərəfindən isə Fən fakültəsinin dekan müavini prof.Esin Sipahi təmsil etdiyi qurumun fəaliyyəti barədə ətraflı məlumat verərək, elm, təhsil sahələrində əlaqələrin genişləndirilməsinin xüsusi əhəmiyyət kəsb etdiyini bildirdi. O, BDU-nun Astrofizika kafedrası ilə birgə layihələrin, eləcə də gələcəkdə ikili diplom proqramlarının həyata keçirilməsində maraqlı olduqlarını nəzərə çatdırdı. Toplantı iştirakçılarının hər biri elmi-tədqiqat sahələri, əldə olunmuş elmi nəticələr haqqında məlumat verərək, qarşılıqlı əməkdaşlıq layihələrinin hər iki tərəf üçün faydalı olacağını qeyd etdilər.
Toplantının sonunda hər iki tərəfin iştirakı ilə birgə əməkdaşlıq protokolunun hazırlanması qərara alındı.