Bakı Dövlət Universiteti Fizika fakültəsi

Bakı Dövlət Universiteti Gelogiya, Fizika fakültələrinin və Respublika Seysmoloji Xidmət Mərkəzinin (RSXM)  birgə təşkilatçılığı ilə 27 mart - Azərbaycan Respublikasında “Elm günü” və AMEA-nın 80 illik yubileyinə həsr olunmuş konfrans keçirilib.

Konfransda giriş sözü ilə çıxış edən Geologiya fakültəsinin dekanı Mamoy Mansurov elmi təşkilatlar və ali təhsil müəssisələri arasında əməkdaşlığın mühüm əhəmiyyət daşıdığını qeyd edib, Respublika Seysmoloji Xidmət Mərkəzində çalışan gənc mütəxəssislərin əksəriyyətinin Geologiya fakültəsinin məzunları olduğunu bildirib.

BDU rektorunun elm və təhsil üzrə müşaviri, AMEA-nın müxbir üzvü, professor Aydın Kazımzadə Universitet rəhbərliyi adından iştirakçıları salamlayaraq,  bu cür tədbirlərin elm və təhsilin inteqrasiyası üçün yaxşı nümunə olduğunu və gələcəkdə əməkdaşlığın daha da genişləndirilməsinə töhfə verəcəyini qeyd edib.

AMEA nəzdində RSXM-nin baş direktoru, AMEA-nın müxbir üzvü, professor Qurban Yetirmişli konfransda “Azərbaycanın müasir seysmogeodinamik  şəraiti” mövzusunda məruzə ilə çıxış edib.

O, RSXM tərəfindən ölkə ərazisində 84 seysmik stansiya vasitəsilə aparılan kompleks geofiziki-seysmoloji-geokimyəvi tədqiqatlar və əldə olunmuş nəticələr haqqında ətraflı məlumat verib. Qurban Yetirmişli Azərbaycan ərazisinin mövcud seysmogen vəziyyəti haqqında da danışıb, maqnitudası 3 və 3-dən yuxarı olan zəlzələlərin qeydə alınması, aparılan monitorinqlərlə bağlı da iştirakçıları məlumatlandırıb.

Professor Qurban Yetirmişli çıxışında həmçinin RSXM-nin beynəlxalq seysmoloji təşkilatlar və xarici universitetlərlə əməkdaşlıq məsələlərinə də toxunub.

BDU-nun Faydalı qazıntılar kafedrasının müdiri, akademik Vasif Babazadə Azərbaycanda seysmoloji tədqiqatların yüksək səviyyədə aparıldığını qeyd edib,  alınmış nəticələri yüksək qiymətləndirib. Akademik çıxışında gənclərə müraciət edərək, elm sahəsində aktiv olmağı, bilik və bacarıqlarını artırmağı tövsiyə edib.

Tədbir mövzu ilə bağlı sualların cavablandırılması ilə yekunlaşıb.