BDU-da "Böyük Zəfərin Başlanğıcı - Aprel Döyüşləri" adlı tədbir keçirilib
05 aprel 2024-cü il tarixində Bakı Dövlət Universitetinin Geologiya, Fizika və Tarix fakültələri Könüllülər təşkilatının və Tələbə Həmkarlar İttifaqı Komitəsinin birgə təşəbbüsü ilə Aprel döyüşlərinin 8-ci ildönümünə həsr olunmuş "Böyük Zəfərin Başlanğıcı - Aprel Döyüşləri" adlı tədbir keçirilib.
Tədbirin əvvəlində Tarix fakültəsinin dekanı İbrahim Zeynalov çıxış edərək Aprel döyüşləri, Azərbaycan tarixində baş vermiş faciələr və onların tarixi kökləri haqqında geniş məlumat verdi, xalqımızın əsrlər boyu soyqırımlara məruz qalmasından bəhs etdi. O, 2016-cı il Aprel döyüşlərində göstərilən qəhrəmanlıqlar və azad edilmiş ərazilərimiz haqqında, həmin qələbənin tarixi əhəmiyyəti barədə, sonrakı zəfərlərin başlanğıcı olması barədə ətraflı məlumat verdi.
Tədbirdə Vətən müharibəsi qazisi Musa Abbasov və Vətən müharibəsi iştirakçısı Ruslan Əhmədov da çıxış etdilər. Onlar öz çıxışlarında döyüşlərdə göstərdikləri qəhrəmanlıqlar haqqında tədbir iştirakçılarına geniş məlumat verdilər.
Sonra tədbirin bədii hissəsi təqdim olundu. Bədii hissə Ümumilli lider Heydər Əliyevin söylədiyi dahi şair Səməd Vurğunun "Azərbaycan" şeiri ilə başladı. Daha sonra tələbələr tarın müşaiyəti ilə "Azərbaycan əsgəri", "Zəfər bayrağı", "Şəhidin sevdiyi" adlı şerləri səsləndirdilər, Azərbaycan xalq mahnısı olan "Sarı gəlin" i ifa etdilər.
Sonda Aprel Döyüşlərinə həsr olunmuş videoçarx nümayiş olundu.
