Fizika və Filologiya fakültələrinin birgə tədbiri
16.11.2022-ci il tarixində BDU Fizika və Filologiya fakltələri könüllülərinin birgə təşkilatçılığı ilə "17 noyabr - Milli Dirçəliş Günü" adlı tədbir keçirilib. Tədbir Fizika fakültəsinin 1-ci kurs tələbəsi Günay Əliyeva və Filologiya fakültəsinin 1-ci kurs tələbəsi Fidan Namazovanın aparıcılığı ilə baş tutub.
Tədbirdə fakültələrin sosial məsələlər və tələbələrlə iş üzrə dekan müavinləri, fakültə sədrləri və tələbələr iştirak ediblər. Tədbir Azərbaycan Respublikasının Dövlət Himninin səsləndirilməsi ilə başladı, daha sonra Vətən uğrunda canından keçmiş şəhidlərin xatirəsi bir dəqiqəlik sükutla yad edildi.
Sonra Fizika fakültəsinin sosial məsələlər və tələbələrlə iş üzrə dekan müavini Məhəmməd Məhərrəmova Dirçəliş gününün tarixi ilə bağlı həmin hadislərin şahidi və iştirakçısı kimi xatirələrini bölüşdü, gənclərin ölkəmizin gələcəyini quracaq bir qüvvə olduğunu, 44 günlük savaşda qazanılan zəfərdən sonra xalqımızın yeni bir dirçəliş dövrünə qədəm qoyduğunu, həmin zəfərin daha böyük qələbələrin başlanğıcı olduğunu qeyd etdi.
Filologiya fakültəsinin sosial məsələlər və tələbələrlə iş üzrə dekan müavini Anar Fərəcova Dirçəliş gününün fəlsəfəsi, həmin günün tariximizdə rolu barədə danışdı.
Daha sonra Fizika fakültəsi 3-cü kurs tələbəsi Vəfa Əliyeva və Filologiya fükültəsinin 2-ci kurs tələbəsi Səbinə Məmmədzadə Milli Dirçəliş Gününün tarixi haqqında məruzələrlə çıxış etdilər. Könüllülər Aytac Salahlı və Mirgülbacı Musalı "İstiqlal marşı" şeirlərini səsləndirdilər. Sonra Fizika fakültəsi 1-ci kurs tələbəsi Elnarə Əliyeva hazırladığı təqdimatla çıxış etdi.
Tədbir fakültə könüllülərinin sədrləri Ramazan Hüşənov və Rəvan Quliyevin çıxışı ilə başa çatıb.
