Bərk cisimlər fizikası kafedrasının dosentinin yubileyi
Bu gün Bakı Dövlət Universitetinin Fizika fakültəsinin Bərk cisimlər fizikası kafedrasının dosenti, fizika-riyaziyyat elmləri namizədi Eldar Həsənovun yubileyidir.
Həsənov Eldar Rəsul oğlu 1939-cu ildə Qərbi Azərbaycanın Krasnoselsk rayonunda anadan olub. Orta təhsilini Ağstafa şəhərində alıb. 1959-1964-cü illərdə Bakı Dövlət Universitetinin Fizika fakültəsində təhsil alıb. 1964-cü ildə Azərbaycan Elmlər Akademiyasının Fizika İnstitutunda “Nəzəri fizika” ixtisası üzrə əyani aspiranturaya daxil olub. Aspirantura təhsilini SSRİ Elmlər Akademiyasının Leninqrad şəhərində yerləşən A.F.İoffe adına Fizika və texnika institutunda Nəzəri fizika şöbəsinin müdiri, professor Lev Qureviçin rəhbərliyi altında davam etdirib. 1971-ci ildə “Dərin tələli yarımkeçiricilərdə daxili və xarici dayanıqsizlıqlar” mövzusunda dissertasiya işini müdafiə edib və fizika-riyaziyyat elmləri namizədi elmi dərəcəsini alıb.
Eldar Həsənovun elmi-tədqiqat işləri bərk cisimlərdə dayanıqsızlıq nəzəriyyəsini əhatə edir. O, yarımkeçirici maddələrdə qeyri-xətti Qann effektinin nəzəri tədqiqatçısı kimi 200-dən artıq elmi işin müəllifidir. Beynəlxalq və Respublika konfranslarında dəfələrlə elmi məruzələrlə çıxış edib. Eldar Həsənov 1971-ci ildən Bakı Dövlət Universitetində elmi-pedaqoji fəaliyyətə başlayıb və hazırda Bərk cisimlər fizikası kafedrasının dosenti vəzifəsində çalışır. O, eyni zamanda Azərbaycan Respublikası Elm və Təhsil Nazirliyi Fizika İnstitutunun “Ensiklopediya və terminologiya şöbəsi”nin rəhbəridir. Kafedradakı pedaqoji fəaliyyəti dövründə “Termodinamika və statistik fizika”, “Bərk cisimlərdə dayanıqsızlıq”, “Səlt mühitlərin mexanikası və elektrodinamikası” kimi nəzəri kurslardan mühazirələr oxuyur və məşğələ dərsləri aparır. Bərk cisimlər fizikası ixtisası üzrə yazılmış çoxlu sayda buraxılış və magistr işlərnə rəhbərlik edib. Universitet tələbələri üçün nəzərdə tutulmuş L.D.Landau və Y.M.Lifşisin müəllifi olduğu “Statistik fizika“ kitabını Azərbaycan dilinə tərcümə edib.
Eldar Həsənov zəhmətkeş alim, ustad pedaqoq olmaqla yanaşı, həm də gözəl insandır. Fizika fakültəsi ailəsi olaraq Eldar müəllimi 85 illik yubileyi münasibətilə səmimi qəlbdən təbrik edirik, ona möhkəm can sağlığı və elmi-pedaqoji fəaliyyətində uğurlar arzulayırıq.