Bərk cisimlər fizikası kafedrasının elmi seminarı keçirilib
10 mart 2025-ci il tarixində Fizika fakültəsi Bərk cisimlər fizikası kafedrasının növbəti elmi seminarı keçirilib. Seminarda kafedranın II kurs magistrantı Sənan Əliyev “Yarımkeçiricilərdə yukdaşıyıcıların konsentrasiyasının rəqs amplitudunun tədqiqi” mövzusunda məruzə edib. Məruzəçi bildirib ki, ədəbiyyat məlumatlarına görə bərk cisimlərdə temperatur qradiyenti olduqda yaranan termomaqnit dalğaları mühiti tarazlıqdan çıxarır. Məsələn, dərin tələli yarımkeçiricilərdə yükdaşıyıcıların generasiyası və rekombinasiyası nəticəsində xarici sabit elektrik sahəsi olduqda konsentrasiya və cərəyan rəqsləri yaranır. Lakin xarici elektrik sahəsi və temperatur qradiyenti olduqda yaranan cərəyan rəqslərinin qeyri-xəttiliyi bu effektlərin nəzəri cəhətdən tədqiqini çətinləşdirir. Təqdim olunmuş işdə yarımkeçiricilərdə yaranan məhz belə rəqslərin tezlik və amplitudu Boqolyubov-Mitropoliski metodu vasitəsilə təyin edilib. Müəyyən olunub ki, rəqslərin tezliyinin qiyməti sıfııncı yaxınlaşma ilə müqayisədə birinci yaxınlaşmada daha çox olur. Göstərilib ki, zaman sonsuzluğa yaxınlaşdıqca rəqsin amplitudu sonlu qiymətə yaxınlaşır. Bunun nəticəsində isə dayanıqlı dinamik rejimin yaranması baş verir. Parametrlərin verilmiş qiymətləri üçün amplitudun zamandan asılılıq qrafiki qurulub. Bundan başqa elektrik sahəsinin qiyməti, eksperiment üçün xüsusi əhəmiyyət kəsb edən yükdaşıyıcıların generasiya və rekombinasiya sabitləri təyin olunub.
Seminarın sonunda məruzə ətrafında müzakirələr aparılaraq, seminar iştirakçıları tərəfindən verilən suallar cavablandırılıb.
