Dissertasiya işinin ilkin müzakirəsi keçirilib
11 iyun 2026-cı il tarixində BDU-nun Fizika fakültəsinin Nanomaterialların kimyəvi fizikası, Yarımkeçiricilər fizikası, Optika və molekulyar fizika kafedralarının və Tədqiqat, İnkişaf və İnnovasiyalar üzrə Mükəmməllik Mərkəzinin Nanoaraşdırmalar ETL-in birgə elmi seminarında "Nanomaterialların kimyəvi fizikası" kafedrasının doktorantı Məhəmməd Bağır Əflatun oğlu Bağırovun 2222.01 Nanoquruluşların fizikası və texnologiyası ixtisasından fizika üzrə fəlsəfə doktoru elmi dərəcəsi almaq üçün təqdim etdiyi "GO-PVS-Ag əsaslı nanokompozitlərin fiziki xassələrinə qamma şüalarının təsiri" mövzusunda dissertasiya işinin ilkin müzakirəsi keçirilib. İclasın sədri Yarımkeçiricilər fizikası kafedrasının müdiri professor Vaqif Salmanov iclası açıq elan edərək iddiaçı və dissertasiya işi haqqında qısa məlumat verdi. Məhəmməd Bağır Bağırov dissertasiya işinin aktuallığı, məqsədi, tədqiqat metodları, əsas elmi nəticələri haqqında iclas iştirakçılarına məruzə etdi. Rəyçilər, f.r.e.d. dos., Fərhad Rüstəmov və f.ü.f.d. Ceyran Sultanova dissertasiya işinin mövzusunun aktuallığı, aparılmış tədqiqatların praktik əhəmiyyəti, alınmış nəticələrin dürüstlüyü haqqında müsbət rəylərini, irad və təkliflərini səsləndirdilər. İddiaçı rəyçilərin iradlarına münasibət bildirdi və iclas iştirakçılarının suallarını cavablandırdı. Açıq səsvermə keçirildi və iclas iştirakçıları Məhəmməd Bağır Bağırovun fizika üzrə fəlsəfə doktoru elmi dərəcəsi almağa layiq olduğuna dair yekdilliklə səs verdilər.
Qərar qəbul olundu ki, Məhəmməd Bağır Əflatun oğlu Bağırovun təqdim etdiyi " GO-PVS-Ag əsaslı nanokompozitlərin fiziki xassələrinə qamma şüalarının təsiri " mövzusunda dissertasiya işi Azərbaycan Respublikasının Prezidenti yanında Ali Attestasiya Komissiyasının fəlsəfə doktoru dissertasiyalarına qoyduğu tələblərə tam cavab verir və onun müəllifi 2222.01 – "Nanoquruluşların fizikası və texnologiyası" ixtisası üzrə fəlsəfə doktoru elmi dərəcəsi almağa layiqdir.
