Bakı Dövlət Universiteti Fizika fakültəsi

13 dekabr 2024-cü ildə BDU-nun nəzdində fəaliyyət göstərən ED 2.19 Dissertasiya şurasının Elmi Seminarında 2212.01 “Nəzəri fizika” ixtisası üzrə Fizika fakültəsinin "Nəzəri fizika" kafedrasının dissertantı Tağıyeva Şahnaz İlqar qızının "Mühitdə və vakuumda mezon və nuklonların qarşılıqlı təsirinin AdS/KXD modellərində öyrənilməsi" mövzusunda dissertasiya işinin müzakirəsi keçirilib. Dissertasiya Şurasının Elmi Seminarının sədri professor Sərhəddin Abdullayev iclası açıq elan edərək 9 nəfər Seminar üzvündən hamısının iştirak etdiyinə görə Elmi Seminarın iclasının səlahiyyətli olduğunu bildirib. Tağıyeva Şahnaz dissertasiya işinin aktuallığı, məqsədi, tədqiqat metodları, əsas elmi nəticələri haqqında iclas iştirakçılarına məruzə edib. Rəyçilər fizika-riyaziyyat elmləri namizədi, dosent Tünzalə Bayramova, Lənkəran Dövlət Universitetinin “Kimya və fizika” kafedrasının baş müəllimi, fizika üzrə fəlsəfə doktoru Elnur Dadaşov dissertasiya işinin mövzusunun aktuallığı, aparılmış tədqiqatların praktik əhəmiyyəti, alınmış nəticələrin dürüstlüyü haqqında müsbət rəylərini, irad və təkliflərini səsləndiriblər. İddiaçı rəyçilərin iradlarına münasibət bildirdi və iclas iştirakçılarının suallarını cavablandırıb. Açıq səsvermə keçirildi və iclas iştirakçıları Şahnaz Tağıyevanın fizika üzrə fəlsəfə doktoru elmi dərəcəsi almağa layiq olduğuna dair (8 leyhinə, 1 neytral) səs veriblər.

Seminarın sonunda qərar qəbul olunub ki, Tağıyeva Şahnaz İlqar qızının fizika üzrə fəlsəfə doktoru elmi dərəcəsi almaq üçün təqdim etdiyi "Mühitdə və vakuumda mezon və nuklonların qarşılıqlı təsirinin AdS/KXD modellərində öyrənilməsi" mövzusunda dissertasiya işi mövzusunun aktuallığına, məzmununa, alınmış nəticələrin elmi yeniliyinə və praktiki əhəmiyyətinə görə Azərbaycan Respublikasının Prezidenti yanında Ali Attestasiya Komissiyasının tələblərinə tam cavab verir, onun müəllifi 2212.01 “Nəzəri fizika” ixtisası üzrə fizika üzrə fəlsəfə doktoru elmi dərəcəsi almağa layiqdir və dissertasiya işini Dissertasiya Şurasında müdafiəyə təqdim etmək olar.