Elmi seminarda polimer nanokompozitlərin alınması və quruluşunun tədqiqi barədə danışılıb
BDU Fizika fakültəsinin Optika və molekulyar fizika kafedrasının növbəti elmi seminarında kafedranın doktorantı Əfsanə Surxaylı “PVX/Si əsaslı polimer nanokompozitlərin alınması və quruluşunun tədqiqi” mövzusunda məruzə edib. Məruzəçi qeyd edib ki, polimer nanokompozitlərin elmi tədqiqat baxımından böyük potensiala malik olması çoxdan məlumdur. Polimerlərin, xüsusən də termoplastik polimerlərin asan emal oluna bilən olması onlar əsasında alınan kompozit materiallara marağı artırır. Polimerə daxil edilmiş nano ölçülü əlavənin ölçüsündən, miqdarından, paylanmasından, alınma üsulundan asılı olaraq yeni materiallar almaq mümkündür.
Ə.Surxaylı bildirib ki, təqdim etdiyi işdə tədqiqat obyektləri olaraq matris kimi polivinilxlorid (PVX), doldurucu kimi isə silisium nanohissəcikləri götürülüb. Silisium nanohissəcikləri əsasında alınmış kompozit materiallar geniş spektrli tətbiq potensialına malikdirlər. Silisium nanodoldurucuları polimerin bir sıra xassələrinin yaxşılaşdırılması, o cümlədən, mexaniki və termik davamlılığının artırılması, yaşama müddətinin uzadılması, başqa sözlə polimer materialın xarici faktorların təsiri ilə köhnəlmə sürətinin ləngidilməsi məqsədi ilə effektiv şəkildə tətbiq olunmaqdadır.
Məruzəçi polivinilxlorid polimeri və silisium nanohissəcikləri əsasında polimer nanokompozitlərin alınması və quruluşunun tədqiq edilməsi üzrə nəticələri seminar iştirakçılarının diqqətinə çatdırıb. Təcrübələrdə müxtəlif konsentrasiyalı PVX+Si polimer nanokompozitlərin rentgen difraktoqrammaları, nümunələrin İQ və Raman spektrləri alınıb və interperatasiya edilib.