Elmi Şuranın iclası keçirilib
31 mart 2023-cü il tarixində Fizika fakültəsi Elmi Şurasının iclası keçirilib. İclasın gündəliyinə Ümummilli Lider Heydər Əliyevin anadan olmasının 100-cü ildönümünə həsr olunmuş “Gələcəyin alimləri” adlı tələbələrin VIII Respublika elmi konfransının təşkili və keçirilməsi, hazırlıq işlərinin vəziyyəti, doktorantların attestasiyası, kafedra seminarlarının keçirilməsi, açıq dərslərin keçirilməsi və cari məsələlər daxil edilib. Elmi Şuranın sədri, fakültə dekanı Bəxtiyar Paşayev iclası açıq elan edərək, gündəliyi iştirakçılara təqdim edib. Elmi Şura üzvləri gündəliyi təsdiq etdikdən sonra tələbələrin “Gələcəyin alimləri” Respublika elmi konfransına hazırlığın vəziyyəti barədə dekan Bəxtiyar Paşayev məlumat verib. O, işlərin qrafik üzrə getdiyini qeyd edib. Sonra elmlər doktoru proqramı üzrə Həbibə Şirinova, fəlsəfə doktoru proqramı üzrə Möhsün Əlizadə, Gülər Səfərəliyeva, Orxan Güləhmədov hesabat veriblər. Elmi Şura üzvlərinin səsverməsi ilə adları çəkilən doktorantlar attestasiyadan keçmiş hesab olunublar.
Bəxtiyar Paşayev kafedra seminarlarının keçirilməsində ləngimələr olduğunu nəzərə çatdıraraq bu istiqamətdə fəaliyyətin intensivləşdirilməsinin zəruri olduğunu bildirdi. Eləcə də açıq dərslərin keçirilməsi vəziyyəti barədə məlumat verildi. Cari məsələlər müzakirə olunduqdan sonra Elmi Şuranın iclası başa çatdı.
