ƏMƏKDAŞLARIMIZ ŞƏHİD MƏZUNUMUZUN AİLƏSİNİ ZİYARƏT ETDİ
06 noyabr 2022-ci tarixində Fizika fakültəsinin dekan müavini Məhəmməd Məhərrəmov, Maddə quruluşu kafedrasının müəllimi Niyazi Həsənov, Fiziki elektronika kafedrasının müəllimi Şirxan Hümbətov Lənkəran rayonunun Osaküçə kəndində rayon rəhbərliyinin iştirakı ilə keçirilən şəhid məzun Şəhriyar Həbibinin anım tədbirlərində iştirak edib.
Şəhriyar Həbibi 19 yanvar 1993-cü ildə Lənkəran rayonunun Osaküçə kəndində anadan olub. 2010-2014-cü illərdə Bakı Dövlət Universitetinin Fizika fakültəsində təhsil alıb. Hərbi xidmətdə olduğu dövrdə Aprel döyüşlərində iştirak edib. Azərbaycan Respublikasının ərazi bütövlüyü uğrunda 27 sentyabr 2020-ci il tarixindən başlayan Vətən müharibəsində Cəbrayıl, Zəngilan istiqamətində gedən döyüşlərdə iştirak edib, noyabrın 6-da Qubadlı döyüşlərində həlak olub. Lənkəranın Osaküçə kəndində dəfn olunub. Azərbaycanın ərazi bütövlüyünün təmin edilməsi uğrunda döyüş əməliyyatlarına qatılaraq hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyi üçün Azərbaycan Respublikasının Prezidenti İlham Əliyevin 15.12.2020-ci il tarixli Sərəncamına əsasən Şəhriyar Həbibi ölümündən sonra "Vətən uğrunda" medalı ilə, 29.12.2020-ci il tarixli Sərəncamına əsasən "Qubadlının azad olunmasına görə" medalı ilə təltif edilib.
Fakültə əməkdaşları əvvəlcə şəhid Şəhriyar Həbibinin məzarını ziyarət etdilər, əklil qoydular. Fakültənin müəllimləri Şəhriyar barədə xatirələrini bölüşdülər. Osaküçə kəndi I və II Qarabağ savaşında 17 şəhid verib. Kəndin mərkəzində xeyirxah insanlar tərəfindən həmin şəhidlərə gözəl bir abidə tikilib. Fizika fakültəsinin əməkdaşları həmin abidəni ziyarət etdilər və sonra Şəhriyar Həbibinin ailəsinə baş çəkdilər.
Allah bütün şəhidlərimizə rəhmət eləsin!
