Fizika fakültəsi məzunlarının görüşü keçirilib
Bakı Dövlət Universiteti Fizika fakültəsinin 2025-ci il üçün sosial sahədə tədbirlər planının 8-ci bölməsində (İşəgötürənlərlə, ictimai qurumlarla və məzunlarla birgə layihələrin artırılması istiqamətində tədbirlərin həyata keçirilməsi) nəzərdə tutulmuş tədbirlərə (Fakültə məzunlarının təşəbbüsləri əsasında layihələrin, tədbirlərin keçirilməsi) uyğun olaraq 22 fevral 2025-ci il tarixində Fizika fakültəsinin 2004-2008-ci il məzunlarının görüşü keçirilib. Görüş çərçivəsində məzunlar əvvəlcə doğma Universitetə baş çəkiblər. Onlar tanış dəhlizləri gəzib, auditoriyalarda olublar, tələbəlik illərinə aid xatirələrini danışıblar, imtahanlara hazırlaşarkən keçirdikləri uzun gecələrdən və universitet divarlarından kənarda davam edən dostluqlarından bəhs ediblər. Bu toplantı sadəcə görüş olmayıb, universitetlə məzunları arasında möhkəm bağın sübutu olaraq göstərdi ki, təhsilin təsiri sinifdə keçirilən illərdən daha da genişdir.
Fizika fakültəsinin məzunlarının böyük əksəriyyəti fizikaya olan məhəbbətlərini gənc nəsillərə ötürməklə öz karyeralarını orta məktəb təhsilinə həsr ediblər. Məzunların arasında müxtəlif peşələrdə çalışanlar da var. Məzunların bəziləri ölkə sərhədlərini aşaraq, müxtəlif ölkələrdə çalışırlar. Keçdiyi yoldan asılı olmayaraq, onların hamısı Bakı Dövlət Universitetində qazandıqları bilik və təcrübədən faydalanıblar.
