Fizika fakültəsində 2023-cü ilə yekun vurulub
26 dekabr 2023-cü il tarixində Fizika fakültəsində yeni ilin gəlişi və 31 dekabr Dünya Azərbaycanlılarının həmrəylik günü ilə bağlı, eləcə də 2023-cü ilə yekun vurmaq məqsədilə tədbir keçirilib. Fakültədə kollektiv arasında qarşılıqlı etimad, tolerantlıq, səmimiyyət, xeyirxahlıq və nəzakət mədəniyyətinin təşviqi məqsədilə keçirilən bu tədbirdə fakültə əməkdaşları iştirak ediblər. Fakültə dekanı Bəxtiyar Paşayev əməkdaşları qarşıdan gələn 2024-cü il və Dünya Azərbaycanlılarının həmrəylik günü münasibəti ilə təbrik edib. O, 2023-cü il - “Heydər Əliyev İli”nin ölkəmiz və Universitetimiz üçün uğurlu olmasına diqqəti çəkdi və bildirdi ki, 2023-cü ilin sentyabrın 19-20-də Qarabağda çox böyük peşəkarlıqla həyata keçirilən lokal antiterror əməliyyatı nəticəsində erməni hərbi birləşmələri diz çökdürüldü, ərazi bütövlüyümüz və suverenliyimiz tam bərpa edildi. Bəxtiyar Paşayev 2023-cü ildə Universitetdə “Heydər Əliyev İli”nə həsr edilmiş tədbirlərdən də söz açdı və fakültəmizdə “Heydər Əliyev İli”nə həsr edilmiş ustad dərslərin, Universitet tələbələri arasında keçirilən Respublika olimpiadasının, Respublika və Beynəlxalq konfransların keçirilməsindən danışdı. O, həmçinin Universitet rəhbərliyinin diqqət və qayğısı sayəsində bəzi problemlərin həll olunmasından, yeni gənc əməkdaşların müəllim kollektivinə qoşulmasından, elmi tədqiqat və pedaqoji fəaliyyət sahəsində qazanılmış uğurlardan danışdı, görülməli işləri diqqətə çatdırdı.
Sonra fakültə ağsaqqalları Niftalı Qocayev, Eldar Məsimov, Vaqif Salmanov və kafedraların bəzi əməkdaşları öz ürək sözlərini söylədilər. Tədbir canlı musiqinin müşaiyəti ilə keçdi. Fakültənin əməkdaşı Sona Güləhmədova maraqlı musiqi nömrələri ilə çıxış etdi.