Fizika fakültəsində Aprel döyüşləri ilə bağlı tədbir keçirilib
03 aprel 2024-cü il tarixində Fizika fakültəsində Aprel döyüşlərinin 8-ci ildönümü ilə bağlı tədbir keçirilib. Tədbirin əvvəlində torpaqlarımızın azadlığı uğrunda canından keçmiş şəhidlərimizin xatirəsi bir dəqiqəlik sükutla yad edilib. Sonra Fizika fakültəsinin sosial məsələlər və tələbələrlə iş üzrə dekan müavini Məhəmməd Məhərrəmov Aprel döyüşləri barədə danışaraq, bu döyüşlərdə qazanılan qələbənin 2020-ci ildə əldə edilmiş Böyük Zəfərin müjdəçisi olduğunu qeyd edib. O, regionumuzda gedən proseslərin təkcə iki dövlətin arasında baş verən münaqişədən ibarət olmadığını, böyük güclərin daima bu prosesləri öz nəzarətində saxlamağa çalışdıqlarını diqqətə çatdıraraq, Azərbaycan Respublikası Prezidenti İlham Əlitevin apardığı düşünülmüş xarici siyasətin ölkəmizin təhlükəsizliyinin təmin olunmasına, bütün ərazilərimizdə suverenliyimizin bərpasına gətirdiyini bildirib. O, həmçinin tariximizi dərindən öyrənməyin, azadlığımız və müstəqilliyimiz uğrunda canından keçmiş şəxsləri daima yad etməyin bizim borcumuz olduğunu deyərək, tələbələrə vaxtaşırı olaraq Şəhidlər Xiyabanını ziyarət etməyi tövsiyə edib. Sonra I kurs tələbəsi Fərqanə Əliyeva Aprel döyüşləri barədə sənədli materiallar əsasında məlumatı təqdim edib, həmin döyüşlər nəticəsində azad edilmiş ərazilərimiz, düşmənə vurulmuş zərbələr, düşmənin canlı qüvvə və texnika sarıdan məruz qaldığı itkilər barədə məlumat verib. Sonda Aprel döyüşlərinə həsr olunmuş videoçarx nümayiş olunub.
