Fizika fakültəsində Novruz tədbiri keçirilib
18 mart 2024-cü il tarixində Fizika fakültəsində Novruz bayramına həsr olunmuş tədbir keçirilib. Tədbir fakültə Tələbə Gənclər Təşkilatı tərəfindən təşkil olunub. Tədbirin aparıcıları, I kurs tələbələri Banu İsayeva və Fərqanə Əliyeva tədbir iştirakçılarını salamlayaraq təbrik üçün sözü Fizika fakültəsinin dekanı Bəxtiyar Paşayevə verdilər. Bəxtiyar Paşayev Novruzun xalqımızın qədim adət-ənənələrindən biri olduğunu, milli-mənəvi dəyərlərimiz sırasında önəmli yer tutduğunu qeyd etdi, gənclərimizin bu cür dəyərlərimizə sahib çıxmasının, onları qoruyub yaşatmalarının vacibliyini diqqətə çatdırdı, Novruza həsr olunmuş şer söylədi. Astrofizika kafedrasının dosenti Zahir Səmədov Novruzun elmi əsasları haqqında danışaraq, bu günün yaz fəslinin başlaması ilə bağlı olduğunu və heç bir dini məna daşımadığını bildirdi. O, qeyd etdi ki, yaz fəsli gündüz və gecənin bərabərləşdiyi andan etibarən başlayır və 2024-cü ildə yaz Azərbaycana martın 20-si səhər saat 07-06-da qədəm basacaq.
Sonra I kurs tələbəsi Könül Abışzade Azərbaycan milli rəqsini ifa etdi. I kurs tələbəsi Nəzrin Musayeva Novruza həsr olunmuş slayd nümayiş etdirdi. O, Novruzun tarixi, Novruz qabağı 4 çərşənbə, Novruz adətləri barədə ətraflı məlumat verdi. Sonda Azərbaycan filmlərində Novruza həsr olunmuş səhnələrin yer aldığı videoçarx nümayiş olundu.
