Fizika fakültəsində professor Sərhəddin Abdullayevlə görüş keçirilib
14 aprel 2023-cü il tarixində Fizika fakültəsi Tələbə Həmkarlar İttifaqı Komitəsinin təşkilatçılığı ilə təşkil olunan “Fakültəmizi tanıyaq” layihəsi çərçivəsində Nəzəri fizika kafedrasının professoru Sərhəddin Abdullayevlə tələbə və müəllimlərin görüşü keçirilib. Tədbiri fakültə dekanı Bəxtiyar Paşayev açıq elan edərək, əvvəlcə professor Sərhəddin Abdullayevi anadan olmasının 84 ili ilə bağlı təbrik edib. O, Sərhəddin Abdullayevin həm bir alim kimi, həm bir müəllim kimi, həm də fizika fənninin təbliğatında əhəmiyyətli rolu olan təhsil işçisi kimi xidmətlərindən danışıb. Tədbirdə BDU Elmi fəaliyyətin təşkili və innovasiya mərkəzinin müdiri professor Mais Süleymanov, Nəzəri Fizika kafedrasının müdiri Məmməd Rəcəbov, kafedranın dosenti Məcid Qocayev Sərhəddin Abdullayev haqqında ürək sözlərini söyləyib. Tədbirdə Sərhəddin Abdullayevin həyat və fəaliyyətinə həsr olunmuş video-çarx nümayiş olunub. Sonda Sərhəddin Abdullayev çıxış edib, keçdiyi həyat yolu, universitetdəki tələbəlik illəri, elmi fəaliyyəti, Azərbaycanda fizika fənni üzrə orta məktəblər və ali təhsil müəssisələri üçün yazdığı dərslik və dərs vəsaitləri haqqında danışıb. Tədbirin sonunda xatirə şəkilləri çəkilib.
