Fizika fakültəsində ustad dərsi keçirilib.
Fizika fakültəsində “Heydər Əliyev ili”nə həsr olunmuş tədbirlər çərçivəsində Yarımkeçiricilər fizikası kafedrasının müdiri professor Vaqif Salmanov tərəfindən “Layvari tipli yarımkeçirici birləşmələrdə qeyri-xətti optik effektlər” mövzusunda ustad dərsi keçirilib. Tədbirdə fakültənin müəllimləri, magistrant və tələbələri iştirak ediblər. Məruzəçi qeyd edib ki, yüksək monoxromatikliyə, paralelliyə və böyük intensivliyə malik olan lazer şüalarının bərk cisimlərlə qarşılıqlı təsiri fizikanın yeni elm sahəsi olan qeyri-xətti optikanın yaranmasına səbəb olub. Onun təqdim etdiyi məruzədə laylı yarımkeçirici birləşmələrdə lazer şüalarının təsiri ilə baş verən qeyri-xətti optik hadisələr, harmonikaların generasiyası, çoxfotonlu optik udulma, zonaların qeyri-xətti dolması və digər hadisələr haqqında məlumat verilir. Tədqiqatlar nəticəsində GaSe kristallarının qeyri-xətti qavrayıcılıq əmsalının etalon hesab edilən GaAs kristallarının qavrayıcılıq əmsalından 3.8-4.1 dəfə böyük olması, ikifotonlu udma əmsalının lazer şüalarının intensivliyindən xətti asılılığı müəyyən edilib. Belə nəticəyə gəlinib ki, GaSe kristallarında müşahidə olunan zonaların dolma effekti bu kristallar əsasında yarımkeçirici lazerlərin yaradılmasına imkan verir.
Aparılan tədqiqat işlərinin praktik əhəmiyyəti kimi nanosaniyəli detektorların, işıq filtrlərinin yaradılması, lazer şüalarının təsiri ilə p-n keçidin alınması, yeni üsulla çoxlaylı strukturların parametrlərinin təyininin mümkünlüyü qeyd olunub.
