Fizika fakültəsinin elmi seminarında fərdi inkişaf yolları barədə danışılıb
14 dekabr 2023-cü il tarixində Fizika fakültəsinin elmi seminarında Elm və Təhsil Nazirliyi Fizika İnstitutunun Təhsil, xarici və ictimaiyyətlə əlaqələr şöbəsinin müdiri Rüstəm Rüstəmov "Fərdi inkişafda mental formalaşma və effektiv seçim" mövzusunda məruzə ilə çıxış edib. Seminarda fakültənin əməkdaşları və tələbələr iştirak ediblər. Məruzəçi qeyd edib ki, özünüdərk fərdi formalaşmanın ilk mərhələsindən başlayaraq daxilində buna ehtiyac duyan hər bir şəxs üçün zəruri və içdə olan ruhi bir tələbatdır. Bunu reallaşdırmaq üçün fərd daim düşünür və düzgün yolun seçilməsi istiqamətində araşdırmalar aparır. Təbii olaraq düzgün seçim yolun daha qısa və effektiv olması anlamını aktuallaşdırır.
Qeyd olunan məqamlarda “nə etməli?” sualını cavablandırmaq üçün mövcud prinsiplərə əsaslanaraq fikir mübadiləsi və bölgüsü aparılması yerinə düşmüş olur. Təbii ki, hər kəsi qane edə biləcək hər hansı bir vahid resept mövcud deyil. Hər bir fərd özünəməxsus olduğu kimi, burada hər fərdə, onun malik olduğu keyfiyyətlərə rəğmən fəlsəfənin və ya fəlsəfələrin müvafiq seqmentlərinin seçilməsi, müəyyənləşməsi, məkan və şəraitə uyğun olaraq uyğunlaşdırılması və sonda müvafiq keyfiyyətlərin zaman-zaman kultivasiya edilməsi zəruridir.
Məruzədə həmçinin mövcud fəlsəfi fikir bölgüsü və fərdin təkamül üçün gözləntilərə nail olmanın istiqamətləri üzrə fikirlər səsləndirilib.
Seminarın sonunda suallar cavablandırılıb və maraqlı müzakirələr aparılıb.
