Əməkdaşlarımız gənclərə Texnofest barədə danışıblar
15 dekabr 2022-ci il tarixində Fizika fakültəsinin əməkdaşları Xəzər rayonunun bir neçə məktəbinin şagirdləri ilə görüş keçiriblər. Xəzər rayon Gənclər və İdman İdarəsinin təşkilatçılığı ilə keçirilən görüşdə rayonun 234, 332 saylı orta məktəblərinin və Abşeron-Binə litseyinin şagirdləri iştirak ediblər. Fizika fakültəsinin Nanomaterialların kimyəvi fizikası kafedrasının müəllimi, doktorant Sara Rəhimzadə və Nanoaraşdırmalar Elmi-tədqiqat laboratoriyasının kiçik elmi işçisi, doktorant Orxan Güləhmədov “Texnofest və gənclər üçün perspektivlər” mövzusunda təqdimatla çıxış etdilər. Onlar cari ildə Bakı şəhərində keçirilən “Texnofest-Azərbaycan” və Türkiyənin Samsun şəhərində keçirilən “Texnofest-Karadəniz” festivalları barədə ətraflı məlumat verdilər, festivallardan maraqlı görüntülər paylaşdılar. Məruzəçilər həmçinin təmsil etdikləri “Nano” komandasının “Texnofest-Azərbaycan” festivalında təqdim etdikləri layihənin uğur qazanaraq III mükafata layiq görüldüyünü qeyd etdilər, “Texnofest-Karadəniz” festivalında keçirdikləri görüşlər, 2023-cü ildə keçirilməsi planlaşdırılan “Texnofest-İstanbul” barədə danışdılar. Onlar şagirdlərə belə festivallarda, layihələrdə iştirak etmək üçün nə etmək lazım olduğunu izah etdilər. Fizika fakültəsinin dekan müavini Məhəmməd Məhərrəmov fakültə barədə, burda təhsilin xüsusiyyətləri, ixtisaslar, perspektivlər barədə şagirdlərə ətraflı məlumat verərək gələcəkdə seçim edərkən Fizika fakültəsi barədə düşünməyi tövsiyə etdi. Görüş zamanı digər orta məktəblərin nümayəndələri belə görüşlərin həmin məktəblərdə də keçirilməsi barədə təkliflər səsləndirdilər. Sara Rəhimzadə və Orxan Güləhmədov tədbir iştirakçılarını maraqlandıran sualları cavablandırdılar.
