Fizika fakültəsinin sabiq əməkdaşı Əmrulla Ağamalıyev vəfat edib
Bakı Dövlət Universitetinin "Bərk cisimlər fizikası" kafedrasının sabiq əməkdaşı, fizika-riyaziyyat elmləri namizədi, dosent Ağamalıyev Əmrulla Qulu oğlu 2024-cü il mart ayının 2-də dünyasını dəyişmişdir.
Ağamalıyev Əmrulla Qulu oğlu 1934-cü ildə anadan olmuşdur. 1954-cü ildə Bakı Dövlət universitetinin Fizika fakültəsinə qəbul olmunuş, 1957-ci ildə təhsilini davam etdirmək üçün M.V.Lomonosov adına Moskva Dövlət Universitetinə göndərilmişdir. 1961-ci ildə həmin Universiteti müvəffəqiyyətlə bitirmiş, aspiranturaya qəbul olunmuşdur. Aspirantura illərini Leninqrad (indiki Sankt-Peterburq) şəhərində A.F.İoffe adına institutda keçirmişdir. 1970-ci ildə “Xüsusi Lorents qrupunun bircinsli fəzasında tam funksiyalar sistemi və relyativistik tənliklər həllinin invariant ayrılışı” mövzusunda dissertasiyaı müdafiə edərək fizika-riyaziyyat elmləri namizədi alimlik dərəcəsi almışdır. 1970-ci ilin sentyabr ayından elmi-pedaqoji fəaliyyətini Bakı Dövlət Universitetində davam etdirmişdir. 1972-1982 illərdə Fizika fakültəsində dekan müavini vəzifəsində çalışmışdır.
Bakı Dövlət Universitetində elmi-pedaqoji fəaliyyəti dövründə “Qrupun təsviri” nəzəriyyəsi mövzusunda ixtisas kursları oxumuş və həmin nəzəriyyənin fizikanın müxtəlif sahələrinə tətbiq etməklə elmi işlər görmüş, Universitetin fizika fakültəsi tələbələrinə “Klassik mexanika” ümumnəzəri kursundan mühazirə və məşğələ dərslərini aparmışdırFizika fakültəsinin tələbələri üçün “Klassik mexanika” kitabını yazmış və nəşr etdirmişdir. Həmin kitab 2009-cu ildə təkrar nəşr olunmuş və oxucu kütləsinin rəğbətini qazanmışdır. Bundan əlavə sevimli müəllimi L.D. Landaunun “Mexanika” kitabını Azərbaycan dilinə tərcümə etmişdir. Ə.Q.Ağamalıyev çox sayda buraxılış işlərinə və magistr dissertasiyalarına rəhbərlik etmişdir.
Bərk cisimlər fizikası kafedrasında işlədiyi müddətdə dosent Əmrulla Ağamalıyev özünü görkəmli alim və savadlı müəllim kimi göstərmişdir.
Görkəmli pedaqoq və gözəl insan olan Əmrulla müəllim əməkdaşlar və tələbələr üçün nümunə olmuş, öz diqqət və qayğısını onlardan əsirgəməmişdir. O yaddaşlarda həyatsevər, təvazökar, geniş dünyagörüşünə və incə yumor hissinə malik bir insan kimi qalmışdır. Tələbələri hər zaman ona böyük hörmət və rəğbət hissi ilə yanaşmış, həmişə ondan dəyərli məsləhətlər almışlar.
Əmrulla Qulu oğlu Ağamalıyevin əziz xatirəsi Fizika fakültəsinin əməkdaşlarının, dostlarının, tələbələrinin və müəllim həmkarlarının yaddaşlarında əbədi yaşayacaqdır.
Allah rəhmət eləsin.