Fizika fakültəsinin tələbələri Şamaxı Astrofizika Rəsədxanasında təcrübədə
Bakı Dövlət Universitetinin Fizika fakultəsinin "Fizika" ixtisası üzrə təhsil alan IV kurs tələbələri 10 may 2024-cü il tarixdən Elm və təhsil Nazirliyinin N.Tusi adına Şamaxı Astrofizika Rəsədxanasında (ŞAR) istehsalat təcrübəsi keçirlər. İstehsalat təcrübəsində tələbələrə dərs planına uyğun olaraq əvvəlcə ŞAR-ın Bakı şəhər bölməsində nəzəri biliklər tədris edilib. Rəsədxananın alimləri tərəfindən tələbələrə Astronomiyanın prioritet tədqiqat sahələri, Günəş sistemi, ulduzlar və onlarda baş verən proseslər, planetlər və qalaktikalar haqqında ümumi məlumatlar verilib. Sonra istehsalat təcrübəsi Pirquludakı Şamaxı Astrofizika Rəsədxanasında davam etdirilib və tələbələrə praktiki dərslər keçilib. Burada onlara ŞAR-ın təcrübəli alimləri tərəfindən teleskoplar və digər astronomik cihazlar, onların iş prinsipi və rəsədxanada aparılan əsas elmi-tədqiqat istiqamətləri üzrə tədris aparılıb.
Tələbələr asudə vaxtlarını da səmərəli keçiriblər. Onlar Dəmirçilər kəndinə baş çəkib, orada yerli sənətkarların işləri ilə tanış olublar. Tələbələr həmçinin burada yerləşən Şamaxı Arxeologiya Muzeyində toplanmış eksponatlarla tanış olub, bu yerlərin tarixi barədə dəyərli məlumatlar əldə ediblər.
