Tələbəmizin kitabının təqdimatı keçirilib
22 fevral 2023-cü il tarixində BDU Tələbə Həmkarlar İttifaqı Komitəsinin təşkilatçılığı ilə Fizika fakültəsi IV kurs tələbəsi Famil Təhməzlinin şer kitabının təqdimatı keçirilib. BDU THİK sədri Hacıbaba Mustafayev Famil Təhməzli və onun ərsəyə gətirdiyi kitab barədə danışdı. Tələbələrin belə təşəbbüslərinin THİK tərəfindən həmişə dəstəkləndiyini diqqətə çatdırdı. Fizika fakültəsinin dekanı Bəxtiyar Paşayev Familin bədii fəaliyyətinin təqdirəlayiq olduğunu qeyd edərək ona həm fizika sahəsində, həm də ədəbi yaradıcılıqda uğurlar arzuladı. BDU Humanitar məsələlər və gənclər siyasəti şöbəsinin müdiri Ramin Səmədov da Famil Təhməzlinin fəaliyyətini gənclərimizin hərtərəfli inkişafının nümunəsi olduğunu qeyd etdi, tədbirdə iştirak edən tələbələri onun kimi fəal olmağa, öz qabiliyyətlərini kəşf etməyə çağırdı. Familin dostları və tələbə yoldaşları onun haqqında ürək sözlərini söylədilər.
