Fizika və Biologia fakültələrinin birgə tədbiri keçirilmişdir
16 aprel 2021-ci il tarixdə Bakı Dövlət Universiteti Fizika və Biologiya fakültələrinin birgə təşkilatçılığı ilə "Qalib ölkənin vətənpərvər, sağlam, bilikli gəncliyi" adlı onlayn tədbir keçirilmişdir. Tədbirdə hər iki fakültənin müəllim və tələbələri iştirak etmişlər. Tədbirin aparıcısı Fizika fakültəsi II kurs tələbəsi Nərmin Həsənli tədbir barədə danışmaq üçün sözü fakültələrin dekan müavinlərinə verdi. Fizika və Biologiya fakültələrinin dekan müavinləri Məhəmməd Məhərrəmov və Musa Cabbarov tədbirin hazırkı dövr üçün aktual bir mövzuya həsr olunduğunu diqqətə çatdıraraq, müasir gəncliyin, xüsusən də tələbələrin üzərinə düşən öhdəliklərdən danışdılar. Onlar qeyd etdilər ki, hər bir Azərbaycan gənci öyrəndikləri ixtisaslar üzrə yüksək biliklərə malik olmaqla yanaşı, həm də müasir dünyagörüşünə, ölkəmizin tarixi, mədəniyyəti haqqında geniş məlumata malik olmalıdırlar ki, bütün platformalarda, informasiya savaşında Azərbaycanı layiqincə təmsil edə bilsinlər. Fizika fakültəsinin müəllimi Tünzalə Bayramova bu istiqamətdə tələbələrə tövsiyələrini çatdırdı. Fizika və Biologiya fakültələrinin Tələbə Gənclər Təşkilatlarının və Tələbə Həmkarlar Komitələrinin aktiv üzvləri mövzu üzrə maraqlı çıxışlar etdilər, Fizika fakültəsi II kurs tələbəsi Turan Daşdəmirovun hazırladığı videoçarx nümayiş olundu.
