Fizika və Mexanika-riyaziyyat fakültələrinin birgə seminarı keçirilib
19 dekabr 2024-cü il tarixində Fizika və Mexanika-riyaziyyat fakültələrinin birgə seminarı keçirilib. Seminarda AR ETN Fizika İnstitutunun professoru Şakir Nağıyev “Kvant zərrəciyinin zamandan asılı bircins sahədə hərəkətinin evolyusiya operatoru metodu ilə təsviri” mövzusunda çıxış edib. Məruzəçi bildirib ki, Evolyusiya operatoru metodu – S - matrisa nəzəriyyəsi kvant sahə nəzəriyyəsində mərkəzi rol oynasa da, kvant mexanikasında bu metod çox nadir hallarda tətbiq olunmuşdur. O, evolyusiya operatoru metodunun dəyişən M(t) kütləli sərbəst zərrəciyin və bircins sahədə olan dəyişən M(t) kütləli zərrəciyin hərəkətlərini təsvir etmək üçün tətbiqi barədə danışıb. Evolyusiya operatorunu qurmaq üçün müəyyən sinif diferensial və sonlu-fərq tənliklərin dəqiq həlləri tapılıb ki, onlar da yeni operator eyniliklər kimi şərh oluna bilər. Həmçinin, baxılan sistemlər üçün ossilyator tipli və müstəvi dalğa tipli dəqiq dalğa funksiyaları qurulub.
