Fiziki elektronika kafedrasının dosentinin yubileyi
Bu gün Bakı Dövlət Universitetinin Fizika fakültəsinin Fiziki elektronika kafedrasının dosenti, fizika-riyaziyyat elmləri namizədi Benyaməddin Davudovun yubileyidir.
Benyaməddin Bəyağa oğlu Davudov 31 mart 1939-cu ildə Qusar rayonunda anadan olub. Orta təhsilini 1947-1957-ci illərdə Quba rayonunda, ali təhsilini isə 1957-1962-ci illərdə Bakı Dövlət Universitetinin Fizika fakültəsində alıb. Universiteti bitirdikdən sonra 1962-1965-ci illərdə Ümumittifaq Elektromexanika İnstitutunun filialında (İstra şəhəri, Moskva vilayəti) mühəndis kimi çalışıb. 1965-1969-cu illərdə Belarus Elmlər Akademiyasının Fizika İnstitutunda (Minsk, Belarus) aspirantura təhsili alıb. 1969-cu ildə “Plazma sürətləndiricilərində gedən fiziki proseslərin tədqiqi” mövzusunda namizədlik dissertasiyasını müdafiə edib. O, Universitetin Fiziki elektronika kafedrasında assistent (1965-1969), baş müəllim (1973-1982) vəzifələrində çalışıb, 1982-ci ildən kafedranın dosentidir.
Benyaməddin Davudov 2 ixtiranın, Respublika və xarici ölkələrin elmi mətbuatında dərc olunmuş 70-dən çox elmi işin və “Radioelektronikanın əsasları”, “Radioelektronikadan laboratoriya işləri”, “Radiofizika praktikumu”, “Radiofizika” kitablarının müəllifidir. Onun elmi rəhbərliyi ilə 1 nəfər namizədlik dissertasiya işini müdafiə edib. O, elmi-pedaqoji fəaliyyəti dövründə müntəzəm olaraq bakalavriat təhsil pilləsində “Radiofizika”, “Elektronikanın fiziki əsasları”, “Fiziki elektronikanın əsasları”, magistratura təhsil pilləsində isə “Radioelektronika”, “Elektron cihazlarının layihələndirilməsi və texnologiyası”, “Optoelektron cihazlarının layihələndirilməsi” fənlərini tədris edib və indi də bu istiqamətdə öz elmi-pedaqoji fəaliyyətini davam etdirir. Fizika fakültəsinin Elmi Şurasının üzvüdür. "BDU-nun 100 illiyi (1919-2019)" Azərbaycan Respublikasının yubiley medalı ilə təltif olunub.
Benyaməddin Davudov zəhmətkeş alim, ustad pedaqoq olmaqla yanaşı, həm də gözəl insandır. Fizika fakültəsi ailəsi olaraq Benyaməddin müəllimi 85 illik yubileyi münasibətilə səmimi qəlbdən təbrik edirik, ona möhkəm can sağlığı və elmi-pedaqoji fəaliyyətində uğurlar arzulayırıq.