Fiziki elektronika kafedrasının professorunun yubileyi
Bu gün Bakı Dövlət Universitetinin Elm və İnnovasiyalar üzrə prorektoru, Fiziki elektronika kafedrasının professoru, fizika elmləri doktoru Hüseyn Məmmədovun yubileyidir.
Hüseyn Mikayil oğlu Məmmədov 02 iyun 1974-cü ildə Şərur rayonunun Havuş kəndində anadan olub. 1991-ci ildə Bakı şəhəri 1 saylı Fizika, riyaziyyat və informatika təmayüllü liseyini medalla bitirib. 1989-1991-ci illərdə fizika fənni üzrə respublika olimpiadasının diplomlarını alıb. 1991-ci ildə BDU-nun Fizika fakültəsinə daxil olub, 1996-cı ildə BDU-nu fizik, fizika müəllimi ixtisasları üzrə fərqlənmə diplomu ilə bitirib. 1996-1999-cu illərdə BDU-nun Fizika fakültəsinin aspirantı olub. 2000-ci ildə dissertasiya müdafiə edərək "Elektronika" ixtisası üzrə fizika-riyaziyyat elmləri namizədi elmi dərəcəsini alıb. 2006-cı ildə dosent elmi adını alıb. 2017-ci ildə dissertasiya müdafiə edərək "Bərk cisimlər fizikası" ixtisasında fizika elm sahəsi üzrə "Elmlər doktoru" elmi dərəcəsini alıb.
Hüseyn Məmmədov 2000-2006-cı illərdə BDU-nun Fiziki elektronika kafedrasında assistent, 2006-2016-cı illərdə BDU-nun Fiziki elektronika kafedrasında dosent, 2016-2019-cu illərdə BDU-nun Fizika fakültəsində dekan müavini, 2019-2020-ci illərdə BDU-nun Həmkarlar İttifaqı Komitəsinin sədri vəzifələrində çalışıb. 2020-ci ildən BDU-nun Elm və İnnovasiyalar üzrə prorektoru və Fiziki elektronika kafedrasının professoru vəzifələrində çalışır. Materialşünaslıq, optoelektronika, fotonika, nazik təbəqələrin texnologiyası və fizikası, foto- və qaz sensorlar, mikro- və nanotexnologiya, nanoquruluşlu materiallar sahəsində elmi tədqiqatlar aparır. Respublika və xarici ölkələrin elmi mətbuatında dərc olunmuş 150-dən çox elmi işin və "Bərk cisim elektronikası", "Radiophysics", "Multilayer Thin Films-Versatile Applications for Materials Engineering" adlı kitablarının müəllifidir.
Hüseyn Məmmədov BDU-nun Elmi Şurasının üzvüdür. BDU-nun nəzdində fəaliyyət göstərən ED 2.19 Dissertasiya Şurasının sədridir. 2019-cu ildə "Tərəqqi" medalı və "BDU-nun 100 illiyi (1919-2019)" Azərbaycan Respublikasının yubiley medalı ilə təltif olunub.
Hüseyn Məmmədov zəhmətkeş alim, ustad pedaqoq olmaqla yanaşı, həm də gözəl insandır. Fizika fakültəsi ailəsi olaraq Hüseyn müəllimi 50 illik yubileyi münasibətilə səmimi qəlbdən təbrik edirik, ona möhkəm can sağlığı və elmi-pedaqoji fəaliyyətində uğurlar arzulayırıq.