Bakı Dövlət Universiteti Fizika fakültəsi

01 aprel 2025-ci il tarixində Fizika fakültəsi Maddə quruluşu kafedrasının növbəti elmi seminarı keçirilib. Seminarda kafedranın doktorantı Jalə Teymurova “PEQ-dekstran-su sistemində fazalara ayrılma mexanizmi və bir sıra qeyri-üzvi duzların bu sistemin hal diaqramına təsirinin təhlili” mövzusunda çıxış edib. Məruzəşçi qeyd edib ki, təqdim olunan iş fazalara ayrılma prosesinin baş vermə mexanizminin incələnməsinə və müxtəlif əlavələr(duzlar) etməklə, konkret tətbiq sahələrinə uyğun xassələrə malik ikifazalı su-polimer sistemlərinin axtarışına, alınmasına və tədqiqinə həsr olunub. Həmçinin  PEQ-dekstran-su ikifazalı sisteminə bir sıra qeyri-üzvi duzların təsiri tədqiq olunmuşdur. NiSO₄, CoSO₄ və MnSO₄ qeyri-üzvi duzlarının 5,10,15%-li məhlullarının ikifazalı su-polimer sisteminin faza diaqramına təsiri öyrənilib. Aparılan ölçmələrlə əldə olunan  nəticələrə əsasən duzun təsiri ilə binodal əyrinin koordinat başlanğıcından uzaqlaşması müşahidə olunub. Duzun konsentrasiyasının artması və homogen oblastın sahəsinin artması ilə polimerlərin birgə suda həll olması asanlaşıb. Bu isə duzun suyun strukturuna dağıdıcı təsir etməsini göstərir. Digər tərəfdən, kritik nöqtədə polimerlərin konsentrasiyalarının cəmi (fazalara ayrılmanı təmin etmək üçün lazım olan cəm) artıb. Sistemin fazalara ayrılma prosesini bərpa etmək üçün strukturlaşdırıcı polimerlər (həm PEQ, həm dekstran suyu strukturlaşdıran polimerlərdir) əlavə etmək lazım gəlir. Alınan nəticələr Samoylov nəzəriyyəsi ilə asanlıqla izah olunur.

Seminarın sonunda məruzəçi sualları cavablandırıb, müzakirələlər aparılıb. İştirakçılar doktoranta dəyərli tövsiyələr veriblər.