Maddə quruluşu kafedrasının elmi seminarı keçirilib
04 dekabr 2024-cü il tarixində Fizika fakültəsi Maddə quruluşu kafedrasının növbəti elmi seminarında kafedranın dosenti Alim Həsənov “Sulu məhlulların strukturu və onun struktur temperaturu kəmiyyəti vasitəsilə tədqiqi” mövzusunda məruzə edib.
Məruzəçi qeyd edib ki, canlı aləmdə gedən bütün proseslər sulu mühitdə və birbaşa və yaxud dolayı yolla suyun iştirakı ilə baş verir. Suya daxil olan istənilən maddə onun strukturunu bu və ya digər istiqamətdə dəyişir. Bu da suyu bioloji aktiv mühit kimi bütün bioproseslərin vacib iştirakçısına çevirir. Bu səbəbdən suya daxil edilən istənilən maddənin suyun strukturuna necə təsir etməsinin öyrənilməsi olduqca aktualdır.
Əvvəllər Eldar Məsimov və başqaları su və sulu məhlulların strukturunu "struktur temperaturu" adlanan kəmiyyətlə xarakterizə etməyi geniş şəkildə əsaslandırıblar. Struktur temperaturu bilavasitə mayedə mövcud olan qarşılıqlı təsirləri özündə əks etdirən inteqral bir parametrdir. Sulu məhlullarda bu parametrin verilmiş temperaturda konsentrasiyadan asılı olaraq qiymətinin dəyişməsi həllolan maddənin suyun strukturuna təsirini müəyyənləşdirməyə imkan verir.