Maddə quruluşu kafedrasının elmi seminarı keçirilib
12 mart 2025-ci il tarixində Fizika fakültəsi Maddə quruluşu kafedrasının “Elm günü”nə həsr olunmuş elmi seminarı keçirilib. Seminarda kafedranın professoru Mais Süleymanov “Böyük Adron Kollayderində Sim nəzəriyyəsini təsdiqləyən nəticələrin axtarışı” mövzusunda çıxış edib. O, çıxışında Avropa Nüvə Tədqiqatları Mərkəzində (CERN, Cenevrə, İsveçrə) fəaliyyət göstərən Böyük Adron Kollayderindən (BAK) əldə edilmiş eksperimental məlumatlar əsasında aparılan tədqiqatı təqdim edib. Məlumatlar BAK-da Sim Nəzəriyyəsini təsdiqləyə biləcək nəticələrin axtarışına həsr olunub. Xüsusilə, Böyük Partlayış Nəzəriyyəsinin əsas mərhələlərindən biri olan Kvark-Glyuon Plazmasının müşahidəsi ilə bağlı son nəticələr təhlil edilib. Bu çərçivədə, Nüvə Modifikasiya Faktorunun (NMF) perpendikulyar impulsdan (pT) asılılığı araşdırılıb. NMF-nin müxtəlif pT diapazonlarında dəyişkən davranışı parton simlərinin yaranması, parçalanması və adronlaşması ilə izah olunub.