Məhəmməd Məhərrəmovun 65 yaşı tamam olub
Məhəmməd Həmid oğlu Məhərrəmov 1957-ci ildə Ağdaş rayonu Pirəzə kəndində anadan olub. 1975-ci ildə Bakıda 51 saylı orta məktəbi bitirib. 1975-1980-ci illərdə BDU-nun Fizika fakültəsində təhsil alıb. 1980-1991-ci illərdə Azərbaycan Elmlər Akademiyasının Bioloji Tədqiqatlar Elmi Mərkəzi, Fizika və Botanika institutlarında baş laborant, kiçik elmi işçi vəzifələrində çalışıb. 1982-1986-cı illərdə Azərbaycan Kənd Təsərrüfatı Nazirliyinin Elmi-tədiqat Əkinçilik İnstitutunun aspirant olub. 1984-1987-ci illərdə Moskva Dövlət Universitetinin biologiya fakültəsində dissertasiya üzrə elmi işi həyata keçirib. 1989-cu ildə dissertasiya müdafiə edərək biologiya elmləri namizədi elmi dərəcəsini alıb. 1993-2011-ci illərdə AR milli təhlükəsizlik orqanlarında xidmət edib. 2014-cü ildən BDU-nun Fizika fakültəsində Sosial məsələlər və tələbələrlə iş üzrə dekan müavinidir. Elmi fəaliyyət istiqaməti biofizikadır. Respublika və xarici ölkələrin elmi mətbuatında dərc olunmuş 50-dən çox elmi işin və "Əməliyyat-axtarış fəaliyyəti haqqında" adlı kitabın müəllifidir.
Məhəmməd Məhərrəmovu yubileyi münasibəti ilə təbrik edir, ona can sağlığı və elmi-pedaqoji fəaliyyətində uğurlar arzulayırıq.