Nəzəri fizika kafedrasının dosentinin yubileyi
Bu gün Bakı Dövlət Universitetinin Fiziki fakültəsinin Nəzəri fizika kafedrasının dosenti, fizika-riyaziyyat elmləri namizədi – fəlsəfə doktoru Məcid Qocayevin yubileyidir.
Məcid Şərafəddin oğlu Qocayev 07 sentyabr 1974-cü ildə Balakən rayonunun Qullar kəndində anadan olub. 1981-1991-ci illərdə Ü. Hacıbəyov adına Qabaqçöl kənd (indiki Qabaqçöl qəsəbəsi) orta məktəbində orta təhsil alıb və məktəbi medalla bitirib. 1989-1991-ci illərdə fizika fənni üzrə respublika olimpiadasının diplomlarını alıb. 1991-ci ildə BDU-nun Fizika fakültəsinə daxil olub, 1996-cı ildə həmin fakültəni “Fizik, fizika müəllimi” ixtisasları üzrə fərqlənmə diplomu ilə bitirib. 1996-1999-cu illərdə BDU-nun Fizika fakültəsinin aspirantı olub. 2000-ci ildə “Zəif və elektromaqnit qarşılıqlı təsirlərdə polyarizasiya hadisələri” mövzusunda dissertasiya müdafiə edərək "Nəzəri fizika" ixtisası üzrə fizika-riyaziyyat elmləri namizədi elmi dərəcəsini alıb. Məcid Qocayev BDU-nun İnformasiya Texnologiyaları Mərkəzində mühəndis (2001-2017), BDU-nun Nəzəri fizika kafedrasında baş müəllim (2010-2017) vəzifələrində çalışıb. 2017-ci ildən BDU-nun Nəzəri fizika kafedrasının dosentidir. Eyni zamanda, 2014-2019-cu illərdə Respublika Elmi Tədqiqatların Əlaqələndirilməsi Şurasında Fizika Problemləri üzrə Elmi Şuranın katibi olub. 2018-2023-cü illərdə BDU-nun "Nəzəri fizika" ixtisasından elmlər doktoru proqramı üzrə doktarantı olub. Elmi işləri əsasən Standart Modelin müxtəlif lepton-lepton və lepton-hadron qarşılıqlı təsir proseslərində yoxlanmasına həsr olunub. Məcid Qocayev "Klassik elektrodinamikadan məsələlər" (azərbaycan və rus dillərində) adlı dərs vəsaitinin, "Lepton-lepton və lepton-hadron elektrozəif qarşılıqlı təsir proseslərində asimmetriyalar" adlı monoqrafik əsərin və eyni zamanda 100-ə yaxın elmi əsərin həmmüəllifi və müəllifidir. Hazırda o, "Elmlər doktoru" elmi dərəcəsini almaq üçün “Lepton-lepton və lepton-hadron elektrozəif qarşılıqlı təsir proseslərində asimmetriyalar” mövzusu üzrə dissertasiya tədqiqatlarını tamamlayıb və iş müdafiə ərəfəsindədir.
Məcid Qocayev BDU-nun nəzdində fəaliyyət göstərən ED 2.19 Dissertasiya Şurasının üzvüdür. "BDU-nun 100 illiyi (1919-2019)" Azərbaycan Respublikasının yubiley medalı ilə təltif olunub.
Məcid Qocayev istedadlı alim və zəhmətkeş pedaqoq olmaqla yanaşı, həm də universitet kollektivinin dərin hörmətini qazanmış gözəl insandır. Fizika fakültəsi ailəsi olaraq Məcid müəllimi 50 illik yubileyi münasibətilə səmimi qəlbdən təbrik edir, ona möhkəm cansağlığı və elmi-pedaqoji fəaliyyətində uğurlar arzulayırıq.