Optika və molekulyar fizika kafedrasının əməkdaşının yubileyi
Bu gün Bakı Dövlət Universitetinin (BDU) Fizika fakültəsinin Optika və molekulyar fizika kafedrasının professoru, biologiya elmləri doktoru İradə Əliyevanın yubileyidir.
İradə Nürəddin qızı Əliyeva 23 oktyabr 1959-cu ildə Gəncə şəhərində anadan olub. Orta təhsilini 1966-1976-cı illərdə Gəncə şəhərində alıb və orta məktəbi “əla” qiymətlərlə bitirib. 1976-cı ildə BDU-nun Fizika fakültəsinə daxil olub və 1981-ci ildə həmin fakültəni fizik, fizika müəllimi ixtisasları üzrə fərqlənmə diplomu ilə bitirib. 1983-1986-cı illərdə BDU-nun Fizika fakültəsinin aspirantı olub. 2003-cü ildə dissertasiya müdafiə edərək "İstilik fizikası və molekulyar fizika" ixtisası üzrə fizika-riyaziyyat elmləri namizədi elmi dərəcəsini alıb. 2000-ci ildə dissertasiya müdafiə edərək "Biofizika" ixtisası üzrə biologiya elmləri doktoru elmi dərəcəsini alıb. 2007-ci ildə “Biofizika” ixtisası üzrə professor elmi adını alıb.
İradə Əliyeva 1986-2011-ci illər ərzində BDU-da “Molekulyar biofizika” Elmi-tədqiqat laboratoriyasında kiçik elmi işçi, elmi işçi, böyük elmi işçi, aparıcı elmi işçi, “Fizika problemləri” Elmi-tədqiqat İnstitutunda baş elmi işçi və Elmi-tədqiqat hissəsinin müdiri vəzifələrində çalışıb. 2011-2021-ci illərdə BDU-nun Tədrisin təşkili və təlim texnologiyaları üzrə prorektoru vəzifəsində işləyib. 2021-ci ildən Fizika fakültəsinin Optika və molekulyar fizika kafedrasının professoru vəzifəsində çalışır.
Elmi fəaliyyəti əsasən bioloji aktiv molekulların – zülal, peptid və hormonların fəza quruluşunun və quruluş-funksiya əlaqələrinin tədqiqi ilə bağlıdır. Yerli və xarici nəşrlərdə dərc edilmiş 200-dən çox elmi əsərin, bir monoqrafiyanın, bir ixtiranın və ali məktəblər üçün yazılmış 2 dərs vəsaitinin müəllifidir. Onun rəhbərliyi ilə 5 elmlər namizədi hazırlanıb. BDU-nun nəzdində fəaliyyət göstərən FD 2.31 Dissertasiya Şurasının üzvidir. İradə Əliyeva 2009-cu ildə Azərbaycan Respublikasının Prezidentinin sərəncamına əsasən “Tərəqqi” medalı, 2019-cu ildə "BDU-nun 100 illiyi (1919-2019)" Azərbaycan Respublikasının yubiley medalı və “Azərbaycan Respublikası Prezidentinin Fəxri Diplomu” ilə təltif olunub.
İradə Əliyeva zəhmətkeş alim, gözəl pedaqoq olmaqla yanaşı, həm də gözəl insandır. Fizika fakültəsi ailəsi olaraq İradə xanımı 65 illik yubileyi münasibətilə səmimi qəlbdən təbrik edirik, ona möhkəm can sağlığı və elmi-pedaqoji fəaliyyətində uğurlar arzulayırıq.