Şəhid məzun Fikrət Zeynallı anılıb
09 noyabr 2024-cü il tarixində Fizika fakültəsinin müəllim və tələbələri 2-ci Qarabağ savaşında səhid olmuş fakültəmizin məzunu Fikrət Zeynallının ailəsini və məzarını ziyarət ediblər.
Fikrət Zeynallı 23 fevral 1995-ci ildə Tovuz rayonunun Aşağı Öysüzlü kəndində anadan olub. 2012-2016-cı illərdə BDU-nun Fizika fakültəsində təhsil alıb. Azərbaycan Silahlı Qüvvələrinin əsgəri olan Fikrət Zeynallı 2020-ci il sentyabrın 27-də Azərbaycan Silahlı Qüvvələri tərəfindən Ermənistan işğalı altında olan ərazilərin azad edilməsi üçün başlanan Vətən müharibəsi zamanı Şuşa və Xocavəndin azadlığı uğrunda gedən döyüşlərdə iştirak edib. Fikrət Zeynallı noyabrın 9-da Xocavənd döyüşləri zamanı şəhid olub. Tovuz rayonunun Aşağı Öysüzlü kəndində dəfn olunub. Azərbaycanın ərazi bütövlüyünün təmin edilməsi uğrunda döyüş əməliyyatlarına qatılan və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyi üçün Azərbaycan Respublikasının Prezidenti İlham Əliyevin 15.12.2020-ci il tarixli Sərəncamına əsasən Fikrət Zeynallı ölümündən sonra "Vətən uğrunda" medalı ilə, 18.12.2020-ci il tarixli Sərəncamına əsasən "Döyüşdə fərqlənməyə görə" medalı ilə, 25.12.2020-ci il tarixli Sərəncamına əsasən "Xocavəndin azad olunmasına görə" medalı ilə təltif edilib.
Fizika fakültəsinin kollekivi şəhid Fikrət Zeynallının məzarına gül dəstələri düzüblər, onun adına Aşağı Öysüzlü kəndində yaradılmış Fikrət bulağına baş çəkiblər, sonra şəhidin ailə üzvləri və qohumları ilə görüşüblər, Fikrət Zeynallının ev muzeyi ilə tanış olublar.
Allah bütün şəhidlərimizə rəhmət eləsin.