Təbrik edirik!
Bu gün Bakı Dövlət Universitetinin Fizika fakültəsinin dekanı, fizika elmləri doktoru Bəxtiyar Paşayevin yubileyidir.
Paşayev Bəxtiyar Gülmalı oğlu 1 aprel 1974-cü ildə Şəmkir rayonunun Könüllü kəndində anadan olub. 1981-1991-ci illərdə Könüllü kənd orta məktəbində təhsil alıb və orta məktəbi "əla" qiymətlərlə bitirib. 1989-1991-ci illərdə fizika fənni üzrə respublika olimpiadasının diplomlarını alıb. 1991-ci ildə BDU-nun Fizika fakültəsinə daxil olub, 1996-cı ildə BDU-nu fizik, fizika müəllimi ixtisasları üzrə fərqlənmə diplomu ilə bitirib. 1996-2000-ci illərdə BDU-nun Fizika fakültəsinin aspirantı olub. 2003-cü ildə dissertasiya müdafiə edərək "İstilik fizikası və molekulyar fizika" ixtisası üzrə fizika-riyaziyyat elmləri namizədi elmi dərəcəsini alıb. 2013-cü ildə "Molekulyar fizika" ixtisası üzrə dosent elmi adını alıb. 2012-2017-ci illərdə BDU-nun Fizika fakültəsinin elmlər doktoru proqramı üzrə doktarantı olub. 2021-ci ildə dissertasiya müdafiə edərək "Molekulyar fizika" ixtisasında fizika elm sahəsi üzrə "Elmlər doktoru" elmi dərəcəsini alıb.
Bəxtiyar Paşayev 1996-2005-ci illərdə ETM "Təfəkkür" Universitetinin Təbiət və Ümumtexniki fənlər kafedrasında baş müəllim, 2005-2008-ci illərdə Azərbaycan Beynəlxalq Universitetinin Fizika kafedrasında baş müəllim, 2008-2012-ci illərdə BDU-nun Fizika Problemləri Elmi Tədqiqat İnstitutunun Bioloji sistemlər fizikası şöbəsində böyük elmi işçi, 2012-2022-ci illərdə BDU-nun Optika və molekulyar fizika kafedrasının dosenti vəzifələrində çalışıb. 2022-ci ildə BDU-nun Fizika fakültəsinin dekanı vəzifəsinə seçilib.
Bəxtiyar Paşayev Bioloji sistemlərdə qarşılıqlı təsirlər və struktur xüsusiyyətləri sahəsində elmi tədqiqatlar aparır. Respublika və xarici ölkələrin elmi mətbuatında dərc olunmuş 130-dan çox elmi işin və "Maye məhlulların elektrik keçiriciliyi" (monoqrafiya), "Mayelərin özlülüyü" (dərs vəsaiti), "Molekulyar fizikadan məsələlər" (dərs vəsaiti) adlı kitablarının müəllifidir. Fizika fakültəsinin Elmi Şurasının sədri, BDU-nun Elmi Şurasının üzvüdür. BDU-nun nəzdində fəaliyyət göstərən ED 2.19 Dissertasiya Şurasının üzvidir. "BDU-nun 100 illiyi (1919-2019)" Azərbaycan Respublikasının yubiley medalı ilə təltif olunub. 2023-cü ildə Ümummilli Lider Heydər Əliyevin 100 illik yubileyinə həsr olunmuş “Ulu Öndər - Müstəqil Azərbaycanın Qurucusu” mövzusunda BDU əməkdaşları arasında məqalə müsabiqəsinin qalibi olub (DİPLOM (I yer)).
Bəxtiyar Paşayev zəhmətkeş alim, gözəl müəllim olmaqla yanaşı, həm də incə qəlbli və şair təbiətli bir insandır. Fizika fakültəsi ailəsi olaraq Bəxtiyar müəllimi 50 illik yubileyi münasibətilə səmimi qəlbdən təbrik edirik, ona möhkəm can sağlığı və elmi-pedaqoji fəaliyyətində uğurlar arzulayırıq.