Təbrik edirik!
Bu gün Bakı Dövlət Universitetinin (BDU) əməkdaşlarının və tələbələrinin hər birinin dərin hörmətini və sevgisini qazanmış BDU-nun rektoru Elçin Babayevin 60 illik yubileyidir. Elm və təhsil insan zəkasının ən parlaq nailiyyəti, əsrlər boyu dahilərin zəhmət və düşüncəsi ilə formalaşan möhtəşəm bir xəzinədir. Bu xəzinənin dəyəri, ona töhfə verən minlərlə alim və müəllimin fədakarlığı ilə ölçülür. Hər bir yeni nəsil bu mirası daha da zənginləşdirərək gələcəyə ötürür, bilik və idrakın nurunu yaymağa davam edir. Bu ənənəni şərəflə və uğurla davam etdirən dəyərli ziyalılarımızdan biri də hörmətli rektorumuz Elçin Babayevdir.
Elçin Babayev 04 aprel 1965-ci ildə Naxçıvan şəhərində anadan olub. Orta təhsilini 1971-1981-ci illərdə Naxçıvan şəhərində alıb və orta məktəbi "əla" qiymətlərlə bitirib. 1981-ci ildə BDU-nun Fizika fakültəsinə daxil olub, 1986-cı ildə BDU-nu fizik, fizika müəllimi ixtisasları üzrə fərqlənmə diplomu ilə bitirib. 1994-cü ildə Rusiya Elmlər Akademiyasının Yer maqnetizmi, ionosfer və radiodalğaların yayılması institutunda “Günəş atmosferində qeyri abiabatik qazdinamik dalğalarının xassələri” mövzusunda dissertasiya müdafiə edərək "Astrofizika, Radioastronomiya" ixtisasları üzrə fizika-riyaziyyat elmləri namizədi elmi dərəcəsini alıb.
BDU-nu bitirdikdən sonra Elçin Babayev müxtəlif vəzifələrdə çalışıb, elmi-tədqiqat və pedaqoji fəaliyyətlə məşğul olub. O, bir sıra ali təhsil müəssisələrində (BDU, Azərbaycan Dövlət Pedaqoji Universiteti və s.) pedaqoji fəaliyyət göstərib, Nəsrəddin Tusi adına Şamaxı Astrofizika Rəsədxanasının elmi işlər üzrə direktor müavini, Şamaxı Astrofizika Rəsədxanasının "Kosmik plazma və Heliogeofiziki problemlər" şöbəsinin rəhbəri olub. 2009-2019-cu illərdə Azərbaycan Respublikasının Prezidenti yanında Elmin İnkişafı Fondunun icraçı direktoru vəzifəsində çalışıb. Azərbaycan Respublikasının Prezidenti İlham Əliyevin 11 mart 2019-cu il tarixli sərəncamı ilə BDU-nun rektoru vəzifəsinə təyin edilib və 27 mart 2024-cü il sərəncamı ilə yenidən həmin vəzifəyə təsdiq olunub.
Elçin Babayev Günəş Yer əlaqələri və kosmik hava variasiyalarının geosferə və biosistemlərə təsiri, Səma cisimlərinin fizika və dinamikası sahəsində elmi tədqiqatlar aparır. Respublika və xarici ölkələrin elmi mətbuatında dərc olunmuş çoxsaylı elmi işlərin müəllifidir. O, bir çox beynəlxalq elmi qurumların - Avrasiya Astronomiya Cəmiyyətinin İdarə Heyətinin, Avropa Astronomiya Cəmiyyətinin, Beynəlxalq Astronomiya İttifaqının, Beynəlxalq Biometeorologiya Cəmiyyətinin üzvüdür. 2023-cü ildə Beynəlxalq Astronavtika Akademiyasının (IAA) fundamental elmlər üzrə müxbir üzvü seçilib. Elçin Babayevin elmi-təşkilati, pedaqoji və ictimai fəaliyyəti dövlət tərəfindən yüksək qiymətləndirilib. 2005-ci ildə Azərbaycan Respublikasının Prezidenti tərəfindən "Tərəqqi" medalı, 2019-cu ildə "BDU-nun 100 illiyi (1919-2019)" Azərbaycan Respublikasının yubiley medalı ilə, 2024-cü ildə "Heydər Əliyevin 100 illiyi (1923-2023)" yubiley medalı ilə təltif olunub.
Elçin Babayev elmi-tədqiqat, pedaqoji və təşkilatçılıq bacarıqlarını özündə cəmləşdirən, bütün qüvvəsini tamamilə sevdiyi işə həsr edən bir insan kimi tanınır. İstedad, peşəkarlıq, kompetentlik və çalışqanlıq – onun nüfuzlu, tanınan və hörmət edilən şəxs kimi yetişməsində əsas rol oynayan keyfiyyətləridir. Gənc mütəxəssislərin hazırlanması Azərbaycan Respublikasının inkişafında ən məsuliyyətli və şərəfli fəaliyyət sahəsidir. Elçin Babayev ömrünün bir çox illərini gənc nəslə həsr edib, tələbələrinə həyatın norma və qaydalarını öyrədib, öz əməyinin nəticəsinə görə məsuliyyət daşımaq hissini aşılayıb, onlarda elmə və öyrənməyə maraq yaradıb, onların vətənpərvər, müasir dünyagörüşünə malik mütəxəssis kimi yetişməsinə çalışıb.
Respublikamızda elmin və təhsilin flaqmanı olan BDU-ya rəhbəlik etdiyi altı il ərzində Elçin Babayev universitetdə təhsil prosesinin effektiv təşkilində, universitetin maddi-texniki bazasının möhkəmləndirilməsində, ölkəmizin təhsil sisteminin ən yaxşı ənənələrinin qorunmasında, yüksək ixtisaslı mütəxəssislərin hazırlanmasında əvəzedilməz işlər görüb. Onun həyata keçirdiyi ardıcıl və məqsədyönlü fəaliyyət nəticəsində BDU dünyanın bir çox nüfuzlu universitetlərinin reytinq sıralamasında xeyli irəliləyərək mühüm mövqelər tutub.
Ad günü hər bir insan üçün keçdiyi ömür yoluna nəzər salmaq, uğurlarını və çətinliklərini qiymətləndirmək, qarşısına yeni hədəflər qoymaq üçün gözəl bir imkandır. Əminliklə deyə bilərik ki, bu gün Elçin Babayevin qürurla xatırlayacağı çox hadisələr və uğurlar var. Bu illər ərzində qazandığı nailiyyətlər, yetişdirdiyi insanlar və qoyduğu dəyərli izlər onun zəhmətsevərliyinin, əzmkarlığının və müdrikliyinin parlaq nümunəsidir. O, hər zaman bilik və bacarığı, mehribanlığı və qayğıkeşliyi ilə ətrafındakı insanlara dəstək olub. Onun təcrübəsi, həyat dərsləri və verdiyi dəyərli məsləhətlər bir çoxları üçün istiqamətverici olub.
Fizika fakültəsi ailəsi olaraq hörmətli rektorumuzu bu əlamətdar gün – 60 illik yubileyi münasibəti ilə səmimi-qəlbdən təbrik edirik. Arzu edirik ki, onun ətrafında hər zaman həmfikirləri, dostları, sevdikləri və doğmaları olsun. Qoy həyatı parlaq təəssüratlarla zəngin olsun, uğur isə daima yol yoldaşı olsun.