Tələbə Elmi Cəmiyyətinin növbəti elmi seminarı keçirilib.
Bakı Dövlət Universiteti Fizika fakültəsinin Tələbə Elmi Cəmiyyətinin növbəti elmi seminarı keçirilib. Seminarda Fizika fakültəsi IV kurs FzM 217-ci qrup tələbəsi Əhmədova Fatimə “Xaos nəzəriyyəsi və mürəkkəb sisitemlər” adlı məruzə təqdim edib. O, qeyd edib ki, xaos nəzəriyyəsi dinamik sistemlərin uzunmüddətli proqnozlaşdırılmasının mümkün olmadığını və kiçik başlanğıc dəyişikliklərinin böyük fərqlərə səbəb ola biləcəyini öyrənir. Bu nəzəriyyənin əsas prinsiplərindən biri "kəpənək effekti"dir, yəni sistemin başlanğıc şərtlərindəki cüzi dəyişikliklər gələcəkdə böyük fərqlərə səbəb ola bilər. Mürəkkəb sistemlər çoxsaylı qarşılıqlı əlaqədə olan komponentlərdən ibarətdir və onların davranışı qeyri-xətti qanunauyğunluqlarla müəyyən edilir. Xaotik sistemlər tamamilə təsadüfi deyil, lakin onların daxili qanunauyğunluqları o qədər həssasdır ki, uzunmüddətli proqnozlar qeyri-mümkün olur. Mürəkkəb sistemlər biologiyada, iqtisadiyyatda, ekologiyada və hətta sosial elmlərdə geniş yayılmışdır və onların öyrənilməsi dərin analitik yanaşmalar tələb edir. Mürəkkəb sistemlərin adaptiv xüsusiyyətləri var və onlar ətraf mühitin dəyişikliklərinə uyğunlaşaraq öz struktur və funksiyalarını optimallaşdıra bilirlər. Xaos nəzəriyyəsi riyaziyyat, fizika, mühəndislik və informasiya texnologiyaları sahələrində geniş tətbiq edilir və mürəkkəb hadisələrin modelləşdirilməsinə imkan yaradır. Məruzə iştirakçılar tərəfindəm maraqla qarşılanıb və müzakirələr aparılıb.