YARIMKEÇİRICİLƏR FİZİKASI KAFEDRASININ ƏMƏKDAŞININ YUBİLEYİ
Bu gün Bakı Dövlət Universitetinin Yarımkeçiricilər fizikası kafedrasının baş müəllimi, fizika-riyaziyyat elmləri namizədi Rövşən Məmmədovun yubileyidir.
Rövşən Məmməd oğlu Məmmədov 9 iyun 1963-cü ildə Bakı şəhərində anadan olub. 1970-1980-cı illərdə Bakı şəhəri Nəsimi rayonu 240 saylı orta məktəbdə təhsil alıb və orta məktəbi “əla” qiymətlərlə bitirib. 1980-ci ildə BDU-nun Fizika fakültəsinə daxil olub və 1985-ci ildə həmin fakültəni fizik, fizika müəllimi ixtisası üzrə bitirib. 2007-ci ildə dissertasiya müdafiə edərək Bərk cisimlər fizikası ixtisası üzrə Fizika-riyaziyyat elmləri namizədi elmi dərəcəsini alıb. “AIBIIICVI tipli ücqat halkogenid birləşmələrin nazik təbəqələrin alınması və xassələri” adlı doktorluq dissertasiya işi tamamlanıb və ilkin müzakirədən keçib.
Rövşən Məmmədov 1985-1989-cu illərdə AMEA-nın Radiasiya Problemləri İnstitutunda mühəndis işləyib. O, BDU-nun Fizika fakültəsinin Yarimkeciriçilər fizikası kafedrasında 1989-2003-cü illərdə baş laborant, 2003-2018-ci illərdə laboratoriya müdiri, 2018-2022-ci illərdə müəllim vəzifələrində çalışıb, 2022-ci ildən isə Yarimkeciriçilər fizikası kafedrasının baş müəllimdir. Yüksək optik həyəcanlaşmada layvari yarımkeçiricilərin fotoelektrik, optik və lüminessensiya xassələri, lazer spektropiyası, qeyri-xətti optika, lazer şüalarının maddələrlə qarşılıqlı təsiri sahələrində elmi tədqiqatlar aparır. Respublika və xarici ölkələrin elmi mətbuatında dərc olunmuş 130-dan çox elmi işin müəllifidir. O, həmçinin 6 kitabın həmmüəllifidir. Rövşən Məmmədov BDU-nun nəzdində fəaliyyət göstərən ED 2.19 Dissertasiya Şurasının elmi seminarının üzvidir. "BDU-nun 100 illiyi (1919-2019)" Azərbaycan Respublikasının yubiley medalı ilə təltif olunub.
Rövşən Məmmədov zəhmətkeş alim, gözəl pedaqoq olmaqla yanaşı, həm də gözəl ailə başçısıdır. Onun 1 qızı və 1 oğlu var. Həyat yoldaşı Çimnaz xanım Bakı Yaradıcılıq Mərkəzində şöbə müdiridir. Qızı Nərgiz Məmmədova hüqüqşünas, oğlu Nicat Məmmədov isə IT üzrə mütəxəsisdir.
Fizika fakültəsi ailəsi olaraq Rövşən müəllimi 60 illik yubileyi münasibətilə səmimi qəlbdən təbrik edirik, ona möhkəm can sağlığı və elmi-pedaqoji fəaliyyətində uğurlar arzulayırıq.