Elmi seminarda maqnit-rezonans tomoqrafiyasının fiziki əsasları müzakirə olunub
25 fevral 2025-ci il tarixində Fizika fakültəsi Maddə quruluşu kafedrasının elmi seminarı keçirilib. Seminarda kafedranın dosenti Niyazi Həsənov “Maqnit-rezonans tomoqrafiyasının fiziki əsasları” mövzusunda məruzə ilə çıxış edib. O, bildirib ki, MRT – nüvə maqnit rezonansı hadisəsindən istifadə etməklə daxili orqanları və toxumaları tədqiq etmək üçün tomoqrafiq tibbi təsvirin alınması üsuludur. MRT-də kompyuter tomoqrafiyasından (KT) və pozitron-emissiya tomoqrafiyasından fərqli olaraq rentqen şüaları və ionlaşdırıcı şüalanma istıfadə olunmur. Tomoqrafiya onurğa beynini və digər daxili orqanları yüksək keyfiyyətlə görüntüləməyə imkan verir. Nüvə maqnit rezonansı metodu orqan toxumalarının hidrogenlə bol olmasına və onların maqnit sahələrinin xüsusiyyətlərinə görə insan orqanizmini tədqiq etməyə imkan verir. Skanerin daxilində yaradılan maqnit sahəsində protonların maqnit momentləri ya sahə, ya da sahəyə əks istiqamətdə yönəlirlər. Əksər protonlar sahə istiqamətində yönəlir, çünki bu enerjinin minimum halına uyğundur. Verilən radiotezlikli impuls protonları həyəcanlandırır və onlar paraleldən antiparalel hala keçirlər. Spin qəfəs relaksasıyası nəticəsində protonlar eneryisi minimum olan hala qayıdırlar. Fəzada xətti dəyişən əlavə maqnit sahələri (qradiyent) yaratmaqla təsvir almaq üçün müəyyən kəsiklər şeçmək olar və görünüş siqnalın fəza tezliklərinin ikiölçülü Furye çevrilmələri yolu ilə alınır.