Fizika fakültəsində elmi seminar keçirilib
Fizika fakültəsinin Optika və molekulyar fizika kafedrasının növbəti elmi seminarı keçirilib. Seminarda kafedranın doktorantı Nəzakət Kərimli “Qeyri-xətti qarşılıqlı təsirdə faza effektləri və tibbi tətbiq məsələləri” mövzusunda məruzə ilə çıxış edib.
Məruzəçi bildirib ki, Brillüen və KARS zamanı, dörddalğalı qeyri-xətti qarşılıqlı təsirdə, laylı domen strukturlarda generasiya proseslərində, nanokompozitlərdə və spektrin orta infraqırmızı diapazonlu kristallarında faza effektləri ikinci və üçüncü harmoniyaların generasiya prosesləri, dalğaların optik parametric güclənməsi, qeyri-elastiki səpilmələr tezlik çevrilmələri zamanı, dalğaların qeyri-xətti optik qarşılıqlı təsiri zamanı araşdırılıb. Göstərilib ki, analitik təhlil metodu kimi sabit intensivlik yaxınlaşmasının istifadə olunması qeyri-xətti qarşılıqlı təsir prosesi haqqında daha dolğun təsəvvür yaradır. Çünki, sabit amplitud yaxınlaşmasından fərqli olan bu metod qeyri-xətti proses üçün əhəmiyyətli olan dalğalar arasında faza münasibətlərinin qeyri-xətti prosesin gedişinə birbaşa təsirini nəzərə almağa imkan verir. Geniş texniki və tibbi tətbiq sahələrinə malik yuxarıda sadalanan proseslərdə harmoniyaların generasiyasında, dalğaların parametrik güclənməsində, qeyri-elasik səpilmə proseslərində tədqiq olunan dalğanın kompleks amplitudu, intensivliyi üçün analitik ifadə alınıb, qeyri-xətti prosesin effektivliyinin maksimum olmasını təyin edən parametrlər müəyyən olunub.
Tibbi tətbiq məsələləri sırasında xüsusi əhəmiyyətə malik lazer şüalanmasının insan gözünə mənfi təsirini azaldan “eye-safe” lazer sistemində tezliyin çevrilməsini təmin edən qarşılıqlı təsir prosesi sabit intensivlik yaxınlaşmasında araşdırılıb. Göz üçün təhlükəsiz dalğa uzunluğu emissiyaları ilə lazer sistemlərinin yaradılması insan sağlamlığı üçün önəmli olan problemləri həll etmək üçün bir yanaşmadır. Təhlil zamanı istifadə olunan sabit intensivlik yaxınlaşması dalğaların qeyri-xətti qarşılıqlı təsirini təhlil edərkən boş dalğanın intensivliyinin təsiri, qarşılıqlı təsir göstərən dalğaların faza uyğunsuzluğu, əks olunma zamanı güzgülərdə itkilər və qeyri-xətti mühitdə udulma eyni vaxtda nəzərə alına bilər. Bu amillər geniş istifadə olunan sabit amplitud yaxınlaşması çərçivəsində araşdırıla bilməz.
Tədqiqatın nəticələri tibbi tədqiqatlarda və bioloji obyektlərin vizual monitorinqində də istifadə olunan effektiv parametrik çeviricilər yaradanlar üçün faydalı olacaq.